Read Bibliya Yera 1951 Zaburi 7 Bible Online

Zaburi 7 - Bibliya Yera 1951 bible

Zaburi 7

¹Shigayoni[2] ya Dawidi, yaririmbiye Uhoraho, kubg’ amagambo ya Kushi wo mu muryango wa Benyamini. Uhoraho, Mana yanje, ni wewe mpungirako: Nkiza abampīga bose, ntabara.

²Uriya ntanshishimure nk’ intambge, Ngw antabagure ata wo kuntabara.

³Uhoraho, Mana yanje, namba naragenjeje ntyo, Namba har’ ukugabitanya mu maboko yanje,

⁴Namb’ uwo twabana amahoro namwihōye inabi, Namba naranyaze umwansi wanje ndamuhōye ubusa,

⁵Umwansi n’ampīge, anshikīre, Ego n’ahonyangire ubugingo bganje mw ivu, N’ashire icubahiro canje mu mukungugu. Sela .

⁶Uhoraho we, hagurukana uburake bgawe, Wisidukire kurwanya ubushangashirwe bg’abarwanizi banje, Ni wikangurire kuntabara: ni wewe washinze urubanza.

⁷Ishengero ry’amahanga ni rigukoranireko, Nawe uvyagire iyo hejuru.

⁸Uhoraho acira amahanga imanza: Uhoraho, uncire urubanza rukwiranye no kugororoka kwanje, n’ukuri kuri muri jewe.

⁹Ububi bg’abanyakibi ni bushire, arikw abagororotsi ubashigikire: Kukw Imana igororoka ari yo isesa imitima n’imishaha.

¹⁰Inkinzo yanje ifashwe n’ Imana, Ni yo ikiza abafise imitima itunganye.

¹¹Imana n’umucamanza agororoka, Mbere n’Imana ishavura imisi yose.

¹²Umuntu n’atihana izokarisha inkota yayo; Umuheto wayo imaze kuwufora, irashize mu ruge.

¹³Kand’ imaze kumwitegurira ivyo kumwica, Imyampi yayo iyidometsek’ umuriro.

¹⁴Ehe rāba, uwo we aramukwa ukugabitanya, Mber’ inda yasamye n’ukugira nabi, avyara ibinyoma.

¹⁵Yimvye icobo arakibirikiza, Agwa mu mugazo yagazuye.

¹⁶Kugira nabi kwiwe kuzomugaruka ku mutwe, Umuryano wiwe uzogwa mu gahanga kiwe.

¹⁷Nzoshima Uhoraho nk’uko bibereye ukugororoka kwiwe, Nzoririmba ntazira izina ry’ Uhoraho asumba vyose.