Read Bibliya Yera 1951 Zaburi 71 Bible Online

Zaburi 71 - Bibliya Yera 1951 bible

Zaburi 71

¹Uhoraho, ni wewe mpungirako: Sinze nigere mmāramāzwa.

²Unkize kubg’ ukugororoka kwawe, undokore: Umbangire ugutwi, unkize.

³Umbere igitandara co kubamwo, aho nzoshobora kwama mpungira: Wangereye kunkiza, Kukw ari wewe gitandara canje n’igihome kinkīngira.

⁴Mana yanje, ngobotora mu kuboko kw’umunyakibi, Ngobotora mu kuboko kw’ umugabitanyi w’ikirara.

⁵Kukw ari wewe vyizigiro vyanje, Mwami Uhoraho: Ni wewe nizera, uhereye mu buto bganje,

⁶Ni wewe wamye unyishigikiriye uhereye mw ivuka ryanje: Ni wewe wankūye mu nda ya mama: Ishimwe ryanje rizokwama kuri wewe.

⁷Mmeze nk’igitangaza kuri benshi: Ariko ni wewe buhungiro bganje bukomeye.

⁸Akanwa kanje kazokwuzura ishimwe ryawe, N’icubahiro cawe umusi wīre.

⁹Ntunte mu gihe c’ubutāma, Ntumpebe mu gihe intege zanje zishize.

¹⁰Kukw abansi banje bamvuga, Ababundira ubugingo bganje baja inama:

¹¹Bat’ Imana yamuhevye; Mumwirukire, mumufate, kukw atagira uwo kumukiza.

¹²Mana, ntumbe kure: Mana yanje, tebuka untabare.

¹³Abarwanizi b’ubugingo bganje bicwe n’isoni baranduke; Abarondera ingene bongirira nabi bambikwe ibitutsi n’ agakēngērwe.

¹⁴Ariko jeho nzokwama nizigira ubudasība, Nzokwiyongeranya kugushima.

¹⁵Akanwa kanje kazovuga inkuru y’ukugororoka kwawe, N’iy’ agakiza kawe umusi wīre: Kuko ntazi igitigiri cavyo.

¹⁶Nzoza mvuga ibikorwa bihambaye vy’Umwami Uhoraho, Nzovuga ukugororoka kwawe, mber’ ukwawe kwonyene.

¹⁷Mana, ni wewe wanyigishije, uhereye mu buto bganje, Kugeza n’ubu ndacavuga ibikorwa vyawe bitangaje.

¹⁸Mana, ntumpebe, kugeza no mu butāma bganje mmeze imvi; Ntarabarira ab’ igihe kizoza amaboko yawe, Ntarabarira abazovuka bose inkomezi zawe.

¹⁹Mana, ukugororoka kwawe gushika hejuru kure: Ni wewe wakoze ibikomeye, Mana, ni nde ahwanye nawe?

²⁰Ni wewe watweretse amagorwa menshi akomeye, Uzokwongera uturabūre, Uzokwongera udukūre i bgina i kuzimu.

²¹Unyongeranirize ubukuru, Uhindukire, unyirure.

²²Nanje nzogushimisha ikembe; Mana yanje, nzoshima ukuri kwawe: Ni wewe nzoririmbira ishimwe mvugira inanga, Ewe Wera w’Abisirayeli.

²³Iminwa yanje izonezerwa cane aho nzokuririmbira ishimwe; N’ubugingo bganje wacunguye buzonezerwa.

²⁴Kand’ ururimi rwanje ruzovuga ukugororoka kwawe burinde bgīra: Kukw abarondera kungirira nabi bishwe n’isoni batēterewe.