Read Bibliya Yera 1951 Zaburi 72 Bible Online

Zaburi 72 - Bibliya Yera 1951 bible

Zaburi 72

¹Zaburi ya Salomo. Mana, uhe umwami uguca imanza kwawe, Uhe umwana w’umwami ukuroranya kwawe.

²Azocira abantu bawe iziroranye, N’abagorwa bawe abacire iz’ ukuri.

³Kuroranya imanza kuzotuma imisozi miremire N’uturambi bizanira abantu amahoro.

⁴Azocira imanza abagorwa bo mu bantu, Akize abana b’abakene, Avunagure umunyagahahazo.

⁵Bazomwubaha izuba rikiriho, Bo n’ukwezi, gushitsa ibihe vyose.

⁶Azomanuka nk’imvura igwa ku vyatsi bitemwe, Nk’imvura y’umuvuvu itosa isi.

⁷Mu misi yiwe abagororotsi bazororanirwa, Kandi hazosēndēra amahoro, gushitsa ah’ ukwezi kuzoviraho.

⁸Azoganza uhereye ku kiyaga ugashitsa ku kiyaga kindi, Kand’ uhereye kuri rwa Ruzi, ugashitsa ku mpera y’isi.

⁹Ababa mu bugaragwa bazomwunamira, Abansi biwe bazorigata umukungugu.

¹⁰Abami b’i Tarushishi n’abo ku bizinga vyo mu kiyaga bazozana amashikanwa, Abami b’i Sheba n’ab’i Seba bazogorora ingorore.

¹¹Mber’ abami bose bazomwikubita imbere, Amahanga yose azomusaba.

¹²Kukw azokiza umukene ah’ azotakambira, N’umugorwa atagira gitabara.

¹³Azogirira akagongwe uworoshe n’umukene, Amagara y’abakene azoyakiza.

¹⁴Azobacungura, abakize agahahazo n’umuryano; Kand’ amaraso yabo azoba ay’ igiciro mu nyonga ziwe.

¹⁵Nukw azoramba, kandi bazomukūrira kw izahabu y’i Sheba; Bamusengere urudaca, Bamuhezagire burinde bgīra.

¹⁶Hazokwera impeke habe agahimbo mu gihugu no ku mpinga z’imisozi; Mw igarura ryavyo bizohungabana nk’ibiti vyo kuri Lebanoni: Abo mu gisagara bazororanirwa batotahare nk’ubgatsi bgo mw isi.

¹⁷Izina ryiwe rizohorah’ ibihe bidashira, Izina ryiwe rizogira uruvyaro, izuba rikiriho: Abantu bazokwisabira umugisha wo guhwana na we, Amahanga yose azomwita umuhirwe.

¹⁸Uhoraho Imana, ni yo Mana y’Abisirayeli, ihimbazwe; Ni yo yonyene ikora ibitangaza:

¹⁹Izina ryayo ry’icubahiro rihimbazwe ibihe bidashira; Kand’ isi yose yuzure icubahiro cayo; Amen, kandi Amen.

²⁰Amasengesho ya Dawidi mwene Isayi ararangiye.