Read Bibliya Yera 1951 Zaburi 75 Bible Online

Zaburi 75 - Bibliya Yera 1951 bible

Zaburi 75

¹Iyi Zaburi yahawe umukuru w’abaririmvyi: bavugira inanga mw ijwi ryitwa Ntuhonnye. N’indirimbo yitwa Zaburi ya Asafu. Mana, turagushima; Turagushima kukw izina ryawe riri hafi. Abantu bakwiza ibikorwa bitangaza wakoze.

²Igihe nashinze ni cashika, Nzoca imanza ziroranye.

³Iy’ isi inyiganyize, bo n’ abayibako bose, Ni jewe ngumije inkingi zayo. Sela .

⁴Mbgira abirata, nti Ntimukirate; N’abanyakibi, nti Ntimukavyure ihembe ryanyu.

⁵Ntimukavyure ihembe ryanyu ngo muritunge kw ijuru, Ntimukavuge mushimantaje amazosi.

⁶Kuko gushirwa hejuru kudaturuka i burasirazuba cank’ i burengerazuba, Canke mu bugaragwa bgo ku misozi.

⁷Arikw Imana ni yo mucamanza: Icisha umwe bugufi, igashira uwundi hejuru.

⁸Kuko mu ntoke z’Uhoraho har’ agakarabo, karimwo vino ibira: Kuzuye vino ituriranije, arayisuka: N’ukuri abanyakibi bo mw isi bazokwīrāngūza urukoma rwayo, barunywe.

⁹Ariko jeho nzokwama mvyamamaza ibihe vyose, Nzoririmbira Imana ya Yakobo ishimwe.

¹⁰Kand’ amahembe yose y’ abanyakibi nzoyakōndōra; Arikw amahembe y’abagororotsi azoshirwa hejuru.