Read Bibliya Yera 1951 Zaburi 77 Bible Online

Zaburi 77 - Bibliya Yera 1951 bible

Zaburi 77

¹Iyi Zaburi yahawe umukuru w’abaririmvyi mu buryo bga Yedutuni. Ni Zaburi ya Asafu. Ndatakambira Imana n’ijwi ryanje, Ndatakambira Imana n’ijwi ryanje, na yo irantega ugutwi.

²Ku musi w’umubabaro wanje narondeye Umwami Imana: Ukuboko kwanje mw ijoro kwararāmvuwe, ntikwatenzura; Umutima wanje wanka kwirurwa.

³Nibuka Imana, ngahagarika umutima: Ndiganyira, umutima wanje ukadendebukirwa. Sela .

⁴Ufata ibigohe vy’amaso yanje kugira ngo simpumirize: Mpagaritse umutima bituma ntashobora kuvuga.

⁵Niyumviriye imisi ya kera, Imyaka y’ibihe vya kera.

⁶Nibuka indirimbo yanje yo mw ijoro, Nkibaza mu mutima; Umutima wanje ugasesana umwete,

⁷Uti Mbeg’ Umwami azoduca tube ruhebga? Ntazosubira kuduhangaza ukundi?

⁸Mbeg’ imbabazi ziwe zagīriyeko rwose ruhebga? Isezerano ryiwe ryapfaniranye gushitsa ibihe vyose?

⁹Mbeg’ Imana yibagiye kugira neza? Uburake bgayo butumye yugarana imbabazi zayo? Sela .

¹⁰Maze ndavuga, nt’ Ivyo n’ indwara iri muri jewe: Mbega ko niyumviriye yuk’ ukuboko kw’i buryo kw’ Īsumba vyose guhinduka!

¹¹Nzovuga ibikorwa vy’Uhoraho, Kuko nzokwibuka ibitangaza vyawe vya kera.

¹²Nzokwiyumvira ivyo wakoze vyose, Nshire umutima ku bikomeye wakoze.

¹³Mana, inzira yawe ir’ ahēra; Ni nde mana ihambaye ihwanye n’Imana Rurema?

¹⁴Ni wewe Mana ikora ibitangaza: Wamenyekanishije inkomezi zawe mu mahanga.

¹⁵Wacunguje abantu bawe ukuboko kwawe, Ni bo ruvyaro rwa Yakobo na Yosefu. Sela .

¹⁶Mana, amazi yarakubonye, Amazi yarakubonye, aratinya: I bgina hahinda agashitsi.

¹⁷Ibicu bisuka amazi, Ijuru rirahinda, Imyampi yawe igenda agashwaro.

¹⁸Imituragaro y’inkuba yawe yari mu gashururu: Imiravyo ibonesha mw isi, Isi ihinda agashitsi, iratigita.

¹⁹Inzira yawe yari mu kiyaga, Inzira zawe zari mu mazi agaranzutse, Ibirenge vyawe ntivyari n’ akehe.

²⁰Warōngōje abantu bawe nk’ ubusho Ukuboko kwa Mose na Aroni.