Read Bibliya Yera 1951 Zaburi 78 Bible Online

Zaburi 78 - Bibliya Yera 1951 bible

Zaburi 78

¹Kwigisha kwa Asafu. Bgoko bganje, ni mutegere ugutwi ukwigisha kwanje: Mubangire amatwi amajambo yo mu kanwa kanje.

²Ndateranura akanwa kanje, nce imigani, Ndavuga amajambo apfinze ya kera.

³Ivyo twumvise tukamenya, Ivyo ba sogokuruza bātubariye,

⁴Ntituzobihisha abuzukuruza babo, Tuzobgira ab’ igihe kizoza ishimwe ry’Uhoraho, N’inkomezi ziwe n’ibikorwa bitangaje yakoze.

⁵Kuko yashimangiye igishingantahe mu ba Yakobo, Yashizeh’ icagezwe mu Bisirayeli, Ico yageze ba sogokuruza, Ngo baze babibarire abana babo:

⁶Kugira ngw ab’ igihe kizoza baze babimenye, ni bo bana bazovuka; Ngo na bo baze bahaguruke, babibarire abana babo.

⁷Kugira ngo bizigire Imana, Kandi ntibibagire ivyo Imana yakoze, Ariko ngo bitondere ivyagezwe vyayo.

⁸Boye kuba nka ba sekuruza, Rwa runganwe rw’ibigāba kandi rw’abagarariji, Urunganwe rw’abatitunganiriza imitima, Imitima yabo itayoboka Imana.

⁹Abefurayimu naho bāri bafise ibirwanishwa batwaye imiheto, Bākimiranye ku musi w’intambara;

¹⁰Ntibitondeye isezerano ry’ Imana, Banse kugendera mu vyagezwe vyayo;

¹¹Bibagiye ivyo yakoze, N’ibikorwa vyayo bitangaje yaberetse.

¹²Yakoreye ibitangaza mu maso ya ba sekuruza Mu gihugu ca Egiputa, mu gahinga k’i Sowani.

¹³Yasatuye ikiyaga, ibacisha hagati yaco; Ihagarika amazi nk’ikirundo.

¹⁴Kandi ku murango yabarōngōza igicu, Ijoro ryose ikabarōngōza kubonesha kw’umuriro.

¹⁵Yasaturiye ibitandara mu bugaragwa, Ibanywesha amazi menshi nk’ ayava i bgina.

¹⁶Kandi mu gitandara yagikūyemw’ amasōko, Itembesha amazi nk’inzūzi.

¹⁷Yamara ntibāsība kuyicumurako, Bakagarariza Īsumba vyose bari mu gihugu cumye.

¹⁸Bagerageresha Imana imitima yabo, Bayigerageresha kwaka ivyo kurya vyo kubamara ipfa.

¹⁹Bacurika Imana, Bati Mbeg’ Imana ishobora gutunganiriza ameza mu bugaragwa?

²⁰Rāba, yakubise ca gitandara, amazi aradudubiza, Imigezi iratemba; Mbega yoshobora kuduha n’ umutsima? Yoronkera abantu bayo inyama?

²¹Ni co catumye Uhoraho avyumva, akaraka, Umuriro ukaziriringira aba Yakobo, Uburake bugapfunduka ku Bisirayeli,

²²Kuko batizeye Imana, Ntibizigire agakiza kayo.

²³Yamar’ ibarira ibicu vyo hejuru, Yugurura inzugi z’ijuru;

²⁴Ibarekurira manu[9] yo kurya, igwa nk’imvura, Ibaha ku mihūre yo mw ijuru.

²⁵Bose barya umutsima w’ abahambaye, Ibarungikira ivyo kurya vyo kubahāza rwose.

²⁶Ihuhutisha mw ijuru umuyaga uturutse i burasirazuba, Irōngōza ububasha bgayo umuyaga uturutse i bumanuko.

²⁷Kand’ ibarekurira inyama zingana n’umukungugu, N’inyoni ziguruka zingana n’umusenyi wo ku kiyaga:

²⁸Izigwisha hagati y’aho bashagaje, Zikikiza insago zabo.

²⁹Nuko bararya, barahīmba; Yabahaye ivyo bifuje.

³⁰Bataribgatandukane n’ukwifuza kwabo, Ivyo kurya vyabo bikiri mu kanwa kabo,

³¹Uburake bg’Imana bubakūrira hasi, Bgica abagabo b’abanyenkomezi bo muri bo, Butsinda hasi imisore yo mu Bisirayeli.

³²Nah’ ivyo vyababayeko, ntibāsība gucumura, Ntibizera ibikorwa vyayo bitangaje.

³³Bituma irangiza imisi yabo nk’impwemu zihumetswe, N’imyaka yabo iyirangiza mu kanya isase.

³⁴Uko yabica, bābaririza ivyayo, Bakagaruka bakazindukira kurondera Imana.

³⁵Bakibuka yukw Imana ari yo gitandara cabo, Kandi yukw Imana isumba vyose ari yo mucunguzi wabo.

³⁶Ariko bayihemesha akanwa kabo, Bakayibeshesha indimi zabo,

³⁷Kukw imitima yabo itāshikamye ngo babane na yo, Kandi batār’ abizigirwa mw isezerano ryayo.

³⁸Ariko yo, kuko yuzuye imbabazi, iharira ukugabitanya kwabo, ntibahonnye, Mbere kenshi iroresha irya uburake bgayo, Ntikangure uburake bgayo bgose:

³⁹Kandi yibuka yukw ar’ abantu buntu, N’umuyaga uhita ntugaruke.

⁴⁰Erega ni kenshi bayigaraririza mu bugaragwa, Bayibabariza mu karēre!

⁴¹Bakihindukiranya, bakagerageza Imana, Bakaratsa Iyera y’Abisirayeli.

⁴²Ntibibuka ukuboko kwayo, Cank’ umusi yabacunguyeko, ikabakiza umurwanizi.

⁴³ Kandi yuko yashize ibimenyetso vyayo muri Egiputa, N’ibitangaza vyayo mu gahinga k’i Sowani:

⁴⁴Igahindura inzūzi zabo amaraso, N’imigezi yabo, ntibashobore kugira ico banywa.

⁴⁵Yabarungitsemw’ amasinzi y’ ibibugu, birabarya; N’ibikere, birabageseza.

⁴⁶Kand’ iha inzikira[10] imirima yabo, N’ivyo bāruhiye ibiha inzige.

⁴⁷Yicisha imizabibu yabo urubura, N’ibiti vyabo vy’imishikima ivyicisha igikonyozi.

⁴⁸Itanga inka zabo ngo zicwe n’urubura, N’imikuku yabo ngw ikubitwe n’inkuba.

⁴⁹Ibatera uburake bgayo bg’ inkazi, Uburake, n’ugushangashirwa, n’ivyago, Igitero c’abamarayika b’abaranduzi.

⁵⁰Iharurira uburake bgayo inzira; Ntiyabakiza urupfu, Arikw irabatanga ngo bicwe n’ikīza;

⁵¹Yica abana b’imfura bose bo muri Egiputa, Imara ubuzibūra bgo mu mahema ya Hamu.

⁵²Arikw abantu bayo bgite ibashorera nk’intama, ibakūrayo, Ibarōngōra mu bugaragwa nk’umukuku.

⁵³Ibarōngōra amahoro, bituma badatinya: Arikw ikiyaga kirengera abansi babo.

⁵⁴Kand’ ibajana ku rugabano rw’ahēra hayo, Kur’ uyu musozi, ukuboko kwayo kw’i buryo kwaguze.

⁵⁵Yirukana amahanga imbere yabo, Ibakubitira amabango ahazoba ishamvu yabo, Yinjiza imiryango y’Abisirayeli mu mahema ya bano.

⁵⁶Yamar’ Abisirayeli bagerageza Imana isumba vyose, barayigarariza, Ntibitondera ivyo yashingiye intahe.

⁵⁷Ariko basubira inyuma, bava mw isezerano nka ba sekuruza: Barahusha, nk’umuheto utaye uruvuto.

⁵⁸Kuko bayirakishije ibitabo vyabo bātavye ku mpinga z’imisozi, Bayiteje ifūhe ibishushanyo vyabo vy’ibigirwamana.

⁵⁹Imana ivyumvise, iraraka, Yanka Abisirayeli urunuka.

⁶⁰Bituma iheba umugerēro w’i Shilo, Ni wo hema yashinze hagati y’abantu.

⁶¹Itanga icubahiro cayo ngo kijanwe kw inyagano, N’ubgiza bgayo ngo buje mu maboko y’umurwanizi.

⁶²Kand’ itanga n’abantu bayo ngo bicwe n’inkota, Irakira ishamvu yayo.

⁶³Umuriro utongora imisore yabo, Abakobga babo nta ndirimbo y’ubukwe bāri bagifise.

⁶⁴Abaherezi babo bicwa n’ inkota, Abapfakazi babo ntibābaririra.

⁶⁵Maz’ Umwami Imana aribambura, nk’uwar’ asinziriye, Nk’umuhizi asemerezwa cane na vino.

⁶⁶Ikubita abarwanizi bayo, ibasubiza inyuma, Ibahindura ruvumwa rudashira.

⁶⁷Kand’ ihinyura ihema rya Yosefu, Ntiyatoranya umuryango wa Efurayimu;

⁶⁸Arikw itoranya umuryango wa Yuda, Umusozi Siyoni yakunze.

⁶⁹Yubaka urusengero rwayo rwera rusumba impinga z’ imisozi, Ruguma nk’isi yahamangiye gushitsa ibihe vyose.

⁷⁰Kand’ itoranya Dawidi umusavyi wayo, Imukūra mu mpongore z’ intama;

⁷¹Imukūra mu gushorera intama zonsa, Kugira ngw aragire aba Yakobo abantu bayo, Abisirayeli ishamvu yayo.

⁷²Nukw abaragirisha umutima utunganye, Abashoreza ubuhinga bg’amaboko yiwe.