Read Bibliya Yera 1951 Zaburi 81 Bible Online

Zaburi 81 - Bibliya Yera 1951 bible

Zaburi 81

¹Iyi Zaburi yahawe umukuru w’abaririmvyi: bavugira inanga mw ijwi ryitwa Gititi. N’iya Asafu. Muririmbishirize Imana ijwi rirenga, ni yo nkomezi zacu; Muvugirize Imana ya Yakobo impundu.

²Shirako muririmbe zaburi, muvuze agashako k’ingoma, Mucurarange inanga nziza n’ ikembe.

³Muvuze inzamba ukwezi kubonetse, N’iy’ ukwezi gufashe, ku musi wacu mukuru.

⁴Kukw iry’ ari ryo bgirizwa ryashingiwe Abisirayeli, N’icagezwe n’Imana ya Yakobo.

⁵Yagishinze mu ba Yosefu kuba igishingantahe, Aho yisidukira, ikūriye hasi igihugu ca Egiputa: Ni ho numvitiye ijwi ry’Uwo ntari nzi.

⁶Ati Nakūye umutwaro ku rutugu rwawe, Amaboko yawe yabohowe ku gitebo.

⁷Waratakamvye ugowe, ndakurokora: Nakwishuye nihishije mu nkuba: Nakugeragereje ku mazi y’i Meriba. Sela .

⁸Bantu banje, ni mwumve, ndabihanikirize, Yemwe bantu ba Isirayeli, icompa mukantega amatwi!

⁹Ntihakabe ikigirwamana c’ abanyamahanga muri mwebge, Kandi ntimukagire ikigirwamana c’abanyamahanga musenga.

¹⁰Ni jewe Uhoraho, Imana yanyu, Nabakūye mu gihugu ca Egiputa: Asama cane, nanje nduzuza akanwa kanyu.

¹¹Arikw abantu banje ntibanyumviye; Abisirayeli baranyikunkumura.

¹²Nanje ndabareka, ngo bakurikire ugukomantara kw’ imitima yabo, Ngo bagendere mu migabo bigeneye.

¹³Icompa abantu banje bakanyumvira, Icompa Abisirayeli bakagendera mu nzira zanje!

¹⁴Notsinda abansi babo vuba, Nohindurira ukuboko kwanje ku barwanizi babo.

¹⁵Abansi b’Uhoraho bakamwunamira bamuhema: Ariko ba bandi bakaramba ibihe vyose.

¹⁶Nobagaburira ingano zisētse neza: Kandi nobahāza ubūki buvuye mu mugina wo mu gitandara.