Read Bibliya Yera 1951 Zaburi 86 Bible Online

Zaburi 86 - Bibliya Yera 1951 bible

Zaburi 86

¹Gusenga kwa Dawidi. Uhoraho, ntegera ugutwi, unyishure, Kuko nd’ umugorwa, nd’ umukene.

²Zigama ubugingo bganje kuko nd’ umukunzi wawe: Ewe Mana yanje, kiza umusavyi wawe akwizigira.

³Ngirira ikigongwe Mwami, Kukw ari wewe ntakambira umusi ukīra.

⁴Nezereza ubugingo bg’umusavyi wawe, Kukw ari wewe Mwami, ncurūrira umutima.

⁵Kuko wewe Mwami, uri mwiza, ugabirije guharira, Kandi wuzuye imbabazi ku bakwambaza bose.

⁶Uhoraho we, tegera ugutwi ugusenga kwanje: Umviriza ijwi ryo kwinginga kwanje.

⁷Ku musi w’amarushwa yanje nzokwambaza, Kuk’ uzonyishura.

⁸Nta gihwanye nawe mu bigirwamana, Mwami; Kandi nta bikorwa biriho bihwanye n’ivyawe.

⁹Mwami, amahanga yose waremye azoza, akwikubite imbere, agusenge: Kandi bazohimbaza izina ryawe,

¹⁰Kuk’ uhambaye, kand’ ukora ibitangaza: Ni wewe Mana wenyene.

¹¹Uhoraho, ndangira inzira yawe; nanje nzogendera mu kuri kwawe; Egeranya umutima wanje kugira ngo wubahe izina ryawe.

¹²Mwami, Mana yanje, nzogushimisha umutima wanje wose; Nzohimbaza izina ryawe ibihe bidashira.

¹³Kukw imbabazi umfitiye ari nyinshi; Kandi wakijije ubugingo bganje ngo ntibuje i bgina i kuzimu.

¹⁴Mana, abibone barampagurukiye, Igitero c’abantu b’ibirara kirondera kunyica, Kandi ntibagushizek’ umutima.

¹⁵Ariko wewe Mwami, ur’ Imana yuzuye imbabazi, ur’ inyabuntu, Uteba kuraka, ugira ikigongwe cinshi n’ukuri kwinshi.

¹⁶Hindukira, ungirire ikigongwe; Uhe umusavyi wawe inkomezi zawe, Ukize umwana w’incoreke yawe.

¹⁷Unyereke ikimenyetso c’ivyiza, Kugira ngw abanyanka bakirābe bamāramāre; Kuko wewe Uhoraho, untabaye, ukammara umubabaro.