Read Bibliya Yera 1951 Zaburi 88 Bible Online

Zaburi 88 - Bibliya Yera 1951 bible

Zaburi 88

¹Iyi ndirimbo yitwa Zaburi n’iya bene Kora, yahawe umukuru w’abaririmvyi; bavugira inanga mw ijwi ryitwa Mahalati Leyanoti. N’indirimbo ya Hemani Umwezerahi yaronkeshejwe ubgenge. Uhoraho, Mana y’agakiza kanje, Ntakambira imbere yawe ku murango no mw ijoro.

²Ugusenga kwanje ni kuje gushika mu nyonga zawe: N’utegere ugutwi ugutakamba kwanje.

³Kuk’ umutima wanje wuzuye imibabaro, Kand’ ubugingo bganje bgēgereye i kuzimu.

⁴Mparūranwa n’abamanuka baja muri rwa rwobo; Mmeze nk’ūtagira gitabara:

⁵Naterewe mu bapfuye, Mmeze nk’abishwe, baryamye mu mva, Abo utacibuka ukundi; Kandi batandukanye n’ukuboko kwawe.

⁶Wanshize mu rwobo rwo hasi, Ahantu h’umwiza i bgina.

⁷Uburake bgawe buranshikamiye, Kandi wambabarishije imipfunda yawe yose. Sela .

⁸Washize kure yanje abo tuzinanyi; Wangize uwo kwankwa urunuka kuri bo: Ndugaranywe, sinshobora gusohoka.

⁹Ijisho ryanje rirarotse kubg’ umubabaro: Nama ngutakambira uko bukeye, Uhoraho, Nkakwayira amaboko.

¹⁰Mbeg’ uzokwereka abapfuye ibitangaza? Abahwereye bazozuka bagushime? Sela .

¹¹Mbeg’ imbabazi zawe zizovugirwa mu mva? Canke k’ur’ umwizigirwa bizovugirwa mu mahonero?

¹²Ibitangaza vyawe bizomenyekanira mu mwiza? Cank’ ukugororoka kwawe kuzomenyekanira mu gihugu c’abibagiranye?

¹³Ariko, Uhoraho, ni wewe ntakambira, Kandi mu gitondo ugusenga kwanje kuzogusanganira.

¹⁴Uhoraho we, n’iki gituma uta ubugingo bganje? N’iki gituma umpisha mu nyonga hawe?

¹⁵Nahereye mu buto bganje mbabazwa, ndi mahwera: Mpagarika umutima uko ntewe n’ubgoba bgawe.

¹⁶Uburake bgawe bg’inkazi burandengeye; Ubgoba unteye burandanduye.

¹⁷Vyankikije nk’amazi umusi urīra; Vyanzengukiye vyose icarimwe.

¹⁸Abakunzi banje n’abagenzi banje wabashize kure yanje, N’abo tuzinanyi baroye mu mwiza.