Read Bibliya Yera 1951 Zaburi 89 Bible Online

Zaburi 89 - Bibliya Yera 1951 bible

Zaburi 89

¹Indirimbo ya Etani Umwezerahi yaronkeshejwe ubgenge. Nzoririmba imbabazi z’ Uhoraho gushitsa ibihe bidashira; Uk’ urunganwe rugenda rukurikira urundi, nzobamenyesha n’akanwa kanje k’ ur’ umwizigirwa.

²Kuko navuze, nt’ Imbabazi zizokomezwa ibihe vyose, No mw ijuru ubgaho, uzohashimangira ukwizigirwa kwawe.

³Nasezeranye isezerano n’uwo natoranije, Narahiye Dawidi umusavyi wanje,

⁴Nti Nzoshimangira uruvyaro rwawe gushitsa ibihe bidashira; Ingoma yawe nzoyikomeza, gushitsa ibihe vyose. Sela .

⁵Ijuru rizoshima ibitangaza vyawe Uhoraho; Rizoshimira mw ikoraniro ry’ abera k’ur’ uwo kwizigirwa.

⁶Ni nde wo mw ijuru yogereranywa n’Uhoraho? Ni nde wo mu bana b’Imana ahwanye n’Uhoraho?

⁷Ni we Mana iteye ubgoba bginshi mw ikoraniro ry’ abera, N’iyo gutinywa kurusha abayikikije bose.

⁸Uhoraho Mana Nyen’ ingabo, Ni nde munyenkomezi ahwanye nawe, Uhoraho? Kuba umwizigirwa kwawe kuragukikije.

⁹Ni wewe uganza ukwishira hejuru kw’ikiyaga: Iy’ imipfunda yaco ikūye hasi, urayizibiza.

¹⁰Ni wewe wamenaguye Rahabu[13], hakamera nk’uwishwe: Abansi bawe wabasābagirishije ukuboko kw’inkomezi zawe.

¹¹Ijuru n’iryawe, isi na yo n’ iyawe: Isi n’ibiyuzuye, ni wewe washizeh’ itanguriro ryayo.

¹²I burārūko n’i bumanuko ni wewe waharemye: I Tabora n’i Herumoni hanezererwa izina ryawe.

¹³Ufise ukuboko kw’inkomezi, Ukuboko kwawe kurakomeye, ukuboko kwawe kw’i buryo gushizwe hejuru.

¹⁴Ukugororoka n’imanza zibereye ni vyo ingoma yawe ihagazeko: Imbabazi n’ukuri ni vyo bikwitangira imbere.

¹⁵Hahirwa ihanga rizi ijwi ry’ impundu: Rigendera mu muco wo mu nyonga hawe, Uhoraho.

¹⁶Banezererwa izina ryawe umusi ukīra: Kand’ ukugororoka kwawe ni kwo kubashirisha hejuru.

¹⁷Kuk’ ur’ icubahiro c’inkomezi zabo: Imbabazi zawe ni zo zizoshirisha hejuru ihembe ryacu.

¹⁸Kukw inkinzo idukīngira ar’ Uhoraho; Umwami wacu n’Uwera w’ Abisirayeli.

¹⁹Ca gihe wabaririye abakunzi bawe nko mu nzozi, Uti Natabaye umunyenkomezi, Nashize hejuru uwatoranijwe mu bantu.

²⁰Nabonye Dawidi umusavyi wanje, Namurobanuje amavuta yanje yera:

²¹Ikiganza canje kizokwama kibana na we, Ukuboko kwanje kuzomuha inkomezi.

²²Umwansi wiwe ntazomuzako giturumbuka, Kand’ umunyakibi ntazomuhahaza.

²³Nanje nzojanjagurira abarwanizi biwe imbere yiwe, Ntsinde hasi abamwanka.

²⁴Arikw imbabazi zanje no kuba umwizigirwa kwanje bizobana na we; Kand’ izina ryanje rizoshirisha hejuru ihembe ryiwe.

²⁵Nzoshira ikiyaga mu ntoke ziwe, N’inzūzi mu kuboko kwiwe kw’i buryo.

²⁶Azontakambira, ati Ni wewe Data, Imana yanje, igitandara c’ agakiza kanje.

²⁷Kandi nzomugira imfura yanje, Asumbe abami bo mw isi.

²⁸Nzomubīkira imbabazi zanje ibihe bidashira, Isezerano ryanje rizohama kuri we.

²⁹Kand’ uruvyaro rwiwe nzoruha kuramba gushitsa ibihe bidashira, Bo n’ingoma yiwe nk’imisi y’ ijuru.

³⁰Namb’ abana biwe bazoreka ivyagezwe vyanje, Ntibagendere mu vyo nageze;

³¹Namba bazorenga ivyo nashinze, Ntibitondere amabgirizwa yanje,

³²Ni ho nzohanisha ibicumuro vyabo inkoni, No kugabitanya kwabo imiramu.

³³Ariko sinzomukūrako rwose imbabazi zanje, Sinzoreka kuba umwizigirwa.

³⁴Sinzova mw isezerano ryanje, Sinzohindura ijambo ryavuye mu kanwa kanje.

³⁵Igihe kimwe narahiye ukwera kwanje; Sinzobesha Dawidi;

³⁶Uruvyaro rwiwe ruzoramba gushitsa ibihe bidashira, Ingoma yiwe izohoraho nk’ izuba imbere yanje.

³⁷Izoshimangirwa gushitsa ibihe bidashira nk’ukwezi; Mw ijuru har’ icabona co kubishingira intahe co kwizigirwa. Sela .

³⁸Ariko none washiburiye kure uwo warobanuje amavuta, uramuheba, Waramurakiye.

³⁹Wanse urunuka isezerano ry’ umusavyi wawe, Wahumanishije igitsibo ciwe kugiterera hasi.

⁴⁰Wasanganguye inzitiro ziwe zose; Wakomvomvoye ibihome vyiwe.

⁴¹Abahita bose baramunyaga: Ahindutse agakēngērwe ku babanyi biwe.

⁴²Washize hejuru ukuboko kw’i buryo kw’abarwanizi biwe, Wanezereje abansi biwe bose.

⁴³Mber’ usubiza inyuma ubugi bg’inkota yiwe, Kandi ntiwamuhaye guhagarara ashikamye mu ntambara.

⁴⁴Watumye ubgiza bgiwe bushira, Watereye hasi ingoma yiwe.

⁴⁵Wagabanije imisi y’ubusore bgiwe, Wamwambitse isoni. Sela .

⁴⁶Uhoraho we, uzogeza hehe kwihisha ibihe vyose? Uburake bgawe buzogeza hehe kwaka nk’umuriro?

⁴⁷Ibuka ingen’ igihe canje ari gito: Ereg’ abana b’abantu bose wabaremeye ubusa!

⁴⁸Ni nde muntu azoramba ntabone urupfu, Agakiza ubugingo bgiwe ukuboko kw’i kuzimu? Sela .

⁴⁹Mwami, imbabazi zawe wahoranye ziri hehe, Izo warahiriye Dawidi mu kwizigirwa kwawe?

⁵⁰Mwami, ibuka ibitutsi batuka abasavyi bawe, Ingene ntwara mu gikiriza ibitutsi vy’amahanga yose ukw ari menshi;

⁵¹Ivyo abansi bawe bādututse, Uhoraho, Ivyo bātutse intambuko z’ uwo warobanuje amavuta.

⁵²Uhoraho ahimbazwe ibihe bitazoshira. Amen, kandi Amen.