Read Bibliya Yera 1951 Zaburi 94 Bible Online

Zaburi 94 - Bibliya Yera 1951 bible

Zaburi 94

¹Uhoraho, Mana Nyen’ uguhōra, Mana Nyen’ uguhōra, kayangana.

²Ewe mucamanza w’abari mw isi, n’uhaguruke: Abibone ubasubirize mu nkōko.

³Ewe Uhoraho, abanyakibi bazogeza hehe, Abanyakibi bazogeza hehe kwitera hejuru?

⁴Bararokomboka, bakavugana amanyama, Inkozi z’ibibi zose zirihaya.

⁵Bamenagura abantu bawe, Uhoraho, Bahahaza ishamvu yawe.

⁶Bica umupfakazi n’inyambukīra, Bica n’impfuvyi.

⁷Bakavuga, bat’ Uhoraho ntaja kubibona, Imana ya Yakobo ntija kubibabara.

⁸Yemwe bijuju vyo mu bantu, ni mwibaze ibi: Mwa bipfu mwe, muzoca ubgenge ryari?

⁹Iyabaditseh’ ugutwi, yobura kwumva? Iyabumvye ijisho, yobura kubona?

¹⁰Imwe ihana ayandi mahanga, yobura guhana, Kand’ ari yo yigisha abantu ubgenge?

¹¹Uhoraho arazi ivyiyumviro vy’abantu Kw ari nk’impwemu zihumetswe gusa.

¹²Ewe Uhoraho, hahirwa umuntu uhana, Ukamwigishisha ivyagezwe vyawe;

¹³Kugira ng’ umuruhure mu misi y’ivyago, Gushitsa ah’ icobo kizokwimbirwa abanyakibi.

¹⁴Kuk’ Uhoraho atazota abantu biwe, Kand’ atazoheba ishamvu yiwe,

¹⁵Kuko guca imanza kuzosubira ku kugororoka, Kand’ abafise imitima itunganye bose ni kwo bazokurikira.

¹⁶Ni nde azokūra hasi ngw antabare kurwanya abanyavyaha? Ni nde azohagarara akantabara ngo turwanye inkozi z’ibibi?

¹⁷Iy’ Uhoraho ataba umutabazi wanje, Ubugingo bganje buba bgaciye bugerēra ahantu h’ agacerere.

¹⁸Nkivuga, nt’ Ikirenge canje kiranyereye; Imbabazi zawe, Uhoraho, zarandamiye.

¹⁹Iy’ amazinda abaye isinzi muri jewe Ivyo umpumuriza binezereza ubugingo bganje.

²⁰Mbeg’ abagoreka imanza bazohūza nawe, Kand’ ari bo bagira ivyagezwe urwitwazo rwo kugira nabi?

²¹Bakoranira hamwe gutera ubugingo bg’umugororotsi, Bagatsindisha amaraso adafise igicumuro.

²²Arik’ Uhoraho yambereye igihome kirekire kinkīngira, Imana yanje n’igitandara c’ ubuhungiro bganje.

²³Kand’ izobagarukanak’ ukugabitanya kwabo, Izobarandura kubg’ icaha cabo, Uhoraho Imana yacu azobarandura.