Read Bibliya Yera 1951 Zaburi 96 Bible Online

Zaburi 96 - Bibliya Yera 1951 bible

Zaburi 96

¹ Ni muririmbire Uhoraho indirimbo nsha: Yemwe abari mw isi mwese, muririmbire Uhoraho.

²Muririmbire Uhoraho, mushemagize izina ryiwe: Mumenyekanishe agakiza kiwe uko bukeye.

³Mwamamaze mu mahanga ubgiza bgiwe, N’ibikorwa bitangaje yakoze muvyamamaze mu moko yose.

⁴Kuk’ Uhoraho ahambaye, abereye gushimwa cane: N’uw’ igitinyiro kuruta ibigirwamana vyose.

⁵Kukw ibigirwamana vyose vy’amahanga ar’ ubusa, Arik’ Uhoraho ni we yaremye amajuru.

⁶Icubahiro n’ububasha bir’ imbere yiwe, Ubushobozi n’igikundiro bir’ ahēra hiwe.

⁷Yemwe miryango y’amahanga, mwaturire Uhoraho, Mwaturire Uhoraho ingen’ afise icubahiro n’inkomezi.

⁸Mwaturire Uhoraho ingen’ izina ryiwe ribereye icubahiro; Muze mu nyubakwa ziwe muzanye ishikanwa.

⁹Musenge Uhoraho mwubashe, mushazishije ukwera: Yemwe abari mw isi mwese, muhindire agashitsi imbere yiwe.

¹⁰Muvuge mu mahanga, mut’ Uhoraho arahangamye: Isi na yo irashimangiye, ntishobora kunyiganyiga; Azocira amahanga imanza zibereye.

¹¹Ijuru ni rinezerwe, isi n’ihimbarwe, Ikiyaga ni kibomborane bo n’ibicuzuye.

¹²Indimiro n’ibizezemwo ni bivuze impundu; Ni ho ibiti vyose vyo mw ishamba bizoririmbishwa n’ akanyamuneza

¹³Imbere y’Uhoraho, kukw agira aze, Agira aze gucira abari mw isi imanza, Azocira abari mw isi imanza zibereye, N’amahanga nk’ukw ar’ umwizigirwa.