Read Bibliya Yera 1951 Zaburi 99 Bible Online

Zaburi 99 - Bibliya Yera 1951 bible

Zaburi 99

¹Uhoraho arahangamye; amahanga ahinze agashitsi! Avyagiye ku Bakerubi;[14] isi iranyiganyiga!

²Uhoraho arahambaye muri Siyoni, Kand’ ari hejuru kure y’amahanga yose.

³Ni batazire izina ryiwe rihambaye riteye ubgoba: Ni we yera.

⁴Inkomezi z’umwami n’ugukunda imanza zibereye; Ni wewe ushinga ibiroranye. Imanza zibereye n’izigororotse ni wewe ubikorera mu ba Yakobo.

⁵Ni mushire hejuru Uhoraho Imana yacu, Mwuname mur’ imbere y’ indava yo musi y’ibirenge vyiwe: Ni we yera.

⁶Mose na Aroni bo mu baherezi biwe, Na Samweli wo mu bambaza izina ryiwe, Bārambaza Uhoraho, akabishura.

⁷Yababaririra mu nkingi y’igicu, Bakitondera ivyo yashingiye intahe n’ibgirizwa yabahaye.

⁸Uhoraho, Mana yacu, wahora ubishura: War’ Imana ibaharira, Naho wabahōra ivyo bakora.

⁹Ni mushire hejuru Uhoraho, Imana yacu, Musengere ku murwa wiwe wera: Kuk’ Uhoraho, Imana yacu, ar’ uwera.