Read Bibliya Yera 1951 Imigani 10 Bible Online

Imigani 10 - Bibliya Yera 1951 bible

Imigani 10

¹Imigani ya Salomo. Umwana w’ubgenge anezereza se, Arik’ umwana w’igipfu ababaza nyina.

²Itunga rironkeshejwe ubugunge ntirigira ikimazi, Arik’ ubugororotsi bukūra mu rupfu.

³Uhoraho ntazokundira umushaha w’umugororotsi k’ ugira inzara, Arikw akaruru k’abanyavyaha azogasunikira hirya.

⁴Ukuboko kw’umunebge kwizanira ubgoro, Arik’ ukuboko kw’umunyamwete kuratungisha.

⁵Ūshwābūra mu ci n’umwana w’ubgenge, Arik’ uwigonera mw iyimbura n’umwana w’agatētereza.

⁶Imigisha iba ku mutwe w’ umugororotsi, Arik’ umuryano wubikiza ku munwa w’umunyavyaha.

⁷Kwibuka umugororotsi kurimw’ umugisha, Arikw izina ry’umunyavyaha rizozimangana.

⁸Ūfise umutima w’ubgenge yemera kubgirizwa, Arik’ ūfise iminwa y’ubuhumbu aratemba.

⁹Ūgenda agororotse agenda amahoro, Arik’ ūgoramangisha inzira ziwe azomenyekana.

¹⁰Ūvuniranira akagohe atera umubabaro, Kand’ ūfise iminwa y’ubuhumbu aratemba.

¹¹Akanwa k’umugororotsi n’ isōko y’ubugingo, Arik’ umuryano wubikiza ku munwa w’umunyavyaha.

¹²Urwanko ruvyura intonganya, Arik’ urukundo rupfuka ibigabitanyo vyose.

¹³Mu minwa y’ūzi gutegēra habonekamw’ ubgenge, Arikw inkoni ibīkiwe ibitugu vy’ūtagira umutima.

¹⁴Abanyabgenge baziganya ukumenya, Arikw akanwa k’igipfu ni ko buyobe bugira butere.

¹⁵Itunga ry’umutunzi rimubera igisagara gikomeye, Arikw ikimara aboro n’ubgoro bgabo.

¹⁶Ubutame bg’umugororotsi buzana ubugingo, Arikw inyungu z’umunyakibi zizana icaha.

¹⁷Ūshira umutima ku gutozwa indero nziza aba ari mu nzira y’ubugingo, Arik’ uwanka guhanwa aba azimiye.

¹⁸Ūpfukapfuka urwanko n’ umunyaminwa y’ibinyoma, Kand’ ūvuga ibirementanyo n’igipfu.

¹⁹Mw isinzi ry’amajambo ntihaburamw’ ugucumura, Arik’ uwigarura mu vy’iminwa ivuga n’umunyabgenge.

²⁰Ururimi rw’umugororotsi ni nk’ifeza z’indobānurwa, Arik’ umutima w’umunyakibi ugira ikimazi gike.

²¹Iminwa y’umugororotsi igaburira benshi, Arikw ibijuju vyicwa no kutagira umutima.

²²Umugisha w’Uhoraho uratungisha, Kandi nta mubabaro awuvangamwo.

²³Gukora ikibi ni nk’ibihimbaro ku gipfu, Kand’ ubgenge ni ko bumerera umuntu atahura.

²⁴Ico umunyakibi atinya kizomushikako, Arikw ico umugororotsi yifuza azokironka.

²⁵Agashururu kamaze guhita umunyakibi ntaba akiboneka, Arik’ umugororotsi n’ibuye ry’itanguriro ryamaho.

²⁶Nk’ukw inkevya imerera amenyo, kandi nk’ukw imyotsi imerera amaso, Ni k’umunyabute amerera abamutumye.

²⁷Ukwubaha Uhoraho kurarambisha, Arikw imyaka y’abanyakibi izogerurwa.

²⁸Ivyizigiro vy’abagororotsi n’ umunezero, Arikw ivyo abanyakibi bishimiye bizoshira.

²⁹Inzira y’Uhoraho n’igihome gikingira umugororotsi, Ariko n’amahonero ku bakora ivy’ ukugabitanya.

³⁰Umugororotsi nta ho azosegenyeshwa, Arikw abanyakibi ntibazohora mu gihugu.

³¹Akanwa k’umugororotsi gatengengera ivy’ ubgenge, Arik’ ururimi rudadika ruzocibga.

³²Iminwa y’umugororotsi izi ibishimwa, Arikw akanwa k’abanyakibi kavuga ibidadi.