Read Bibliya Yera 1951 Imigani 11 Bible Online

Imigani 11 - Bibliya Yera 1951 bible

Imigani 11

¹Umunzane ubesha n’igisesema k’Uhoraho, Arikw ikilo c’ukuri kiramuhimbara.

²Ubgibone buje, ni ho haza gutētērwa, Arik’ ubgenge bubana n’ abicishije bugufi.

³Ugutungana kw’abagororotsi kuzobarōngōra, Arik’ ukudambikanya kw’ ingunge kuzozihonnya.

⁴Itunga ntirigira ikimazi ku musi w’uburake, Arik’ ubugororotsi bukūra mu rupfu.

⁵Ubugororotsi bg’umuntu atunganye buzogorora inzira yiwe, Arik’ umunyakibi azotsitara ku bubi bgiwe bgite.

⁶Ubugororotsi bg’abagororotsi buzobakiza, Arikw abakora ivy’ ubugunge bazofatwa n’ukugira nabi kwabo.

⁷Umuntu w’umunyakibi ni yapfa, ivyo yishimiye bizoshira, Kand’ ivyizigiro vy’abagabitanya birashira.

⁸Umugororotsi akizwa ivyago, Kand’ umunyakibi agwa mu mpōrero yiwe.

⁹Umuntu atubaha Imana yicisha mugenzi we akanwa kiwe, Arikw abagororotsi barokorwa kubgo kumenya ubgenge.

¹⁰Abagororotsi iyo baguwe neza igisagara kiranezerwa, Kand’ abanyakibi iyo batikiye impundu zirasēsēra.

¹¹Umuhezagiro w’abagororotsi ushira igisagara hejuru, Arikw akanwa k’abanyakibi karagisangangura.

¹²Ūkēngēra mugenzi we nta mutima agira, Arik’ umuntu azi ubgenge ariyihorerera.

¹³Ūgendagenda ar’ indanyangu amena ibanga, Arik’ ūri n’umutima wizigirwa agumya ijambo.

¹⁴Ahabuze abarōngōra b’ubgenge abantu barahenebera, Ariko mu nama ya benshi habonekamw’ amahoro.

¹⁵Uwigize ishinga ku wundi bizomugirira nabi, Arik’ uwanka ivy’ ukwishinga aba amahoro.

¹⁶Umugore w’umunyabuntu yamana icubahiro, Kand’ abagabo b’abahambazi bamana itunga.

¹⁷Umunyakigongwe agirira neza umutima wiwe ubgiwe, Ariko ruburakigongwe agirira nabi umubiri wiwe ubgiwe.

¹⁸Umunyakibi aca ingero y’ibihendo, Arik’ ūbiba ubugororotsi aronka impēra y’ukuri.

¹⁹Ubugororotsi bushikana umuntu ku bugingo, Arik’ ūkurikirana ikibi aba yikwegera urupfu.

²⁰Abagoreka mu mitima n’igisesema k’Uhoraho, Arikw abatunganya mu nzira baramuhimbara.

²¹Vy’ukuri, umunyakibi akazobura guhanwa! Arik’ uruvyaro rw’abagororotsi ruzorokorwa.

²²Umugore w’akazuru gusa arikw atazi kuroranya, Ameze nk’impeta y’izahabu yambitswe ingurube mu zuru.

²³Ivyo abagororotsi bifuza bibazanira ivyiza gusa, Arikw ivyo abanyakibi bishimira bibazanira kurakirwa.

²⁴Umwe atanga isābagire, akarushiriza kwunguka, Uwundi yikumirakw ivyo yar’ akwiye gutanga, bimukwegera ubukene.

²⁵Umutima urekura uzototahara, Kand’ ūvomera abandi azovomerwa na we.

²⁶Uwikumirakw impeke abantu bazomuvuma, Arik’ umuhezagiro uzoba k’ ūzishōra.

²⁷Ūrondera ivyiza inzirabgira aba arondeye gushimwa, Arik’ ūhahamira ikibi kizomugarukako.

²⁸Uwizigira ubutunzi bgiwe azotemba, Arikw abagororotsi bazototahara nk’ikibabi kiremvye.

²⁹Ūtera urugo rwiwe imivurungano azoronka umuyaga kw iragi, Kand’ igipfu kizoba umushumba w’ūfise umutima w’ubgenge.

³⁰Imbuto y’umugororotsi n’igiti c’ubugingo, Kand’ ūfise ubgenge ahindura imitima y’abantu.

³¹Rāba, umugororotsi azogererwa ibikwiranye na we mw isi: Non’ umunyakibi n’umunyavyaha ntibazorushiriza?