Read Bibliya Yera 1951 Imigani 12 Bible Online

Imigani 12 - Bibliya Yera 1951 bible

Imigani 12

¹Ūkunda gutozwa indero nziza aba akunda ubgenge, Arik’ uwanka guhanwa aba ar’ ikiyingiyingi.

²Umunyangeso nziza atoneshwa n’Uhoraho, Arik’ umuntu w’imigabo y’ ibibi Uhoraho azomucirakw iteka.

³Umuntu ntacimbatazwa n’ ikibi, Arikw imizi y’abagororotsi nta ho izonyiganyizwa.

⁴Umugore atunganye abera umugabo wiwe igitsibo mu mutwe, Arik’ uw’ agatētereza amubera nk’ikimungu mu magufa.

⁵Ivyiyumviro vy’abagororotsi biraroranye, Arikw imigabo y’abanyakibi n’ibinyoma.

⁶Amagambo y’abanyakibi abundira kuvisha amaraso, Arikw akanwa k’abagororotsi bo kazobakiza.

⁷Abanyakibi baraheneberezwa bagashira, Arikw inzu y’abagororotsi ihagarara ishikamye.

⁸Umuntu ashimirwa ubgenge bgiwe nk’uko bungana, Arik’ ūfise umutima ugoramye baramugaya.

⁹Uwishira hejuru akabura utw’ arya Arutwa n’inēra yifitiye uwo itunze.

¹⁰Umuntu agororotse ababara igitungwa ciwe, Arik’ umutima w’abanyakibi n’inkazi.

¹¹Ūrima itongo ryiwe azogira indya nyinshi, Arik’ ūkurikira ibitagira ikimazi nta mutima agira.

¹²Umunyavyaha yifuza icaguye mu mutego w’abanyakibi, Arik’ umuzi w’abagororotsi utuma bama.

¹³Ibicumuro vy’iminwa y’umuntu w’ikibi bimubera umutego; Arik’ umugororotsi akira ivyago.

¹⁴Umuntu azohāga ivyiza, abiheshejwe n’ibivuye mu kanwa kiwe, Kand’ umuntu ahabga ibihwanye n’ibikorwa vy’amaboko yiwe.

¹⁵Inzira y’igipfu irabereye mu maso yaco ubgaco, Arik’ ūfise ubgenge yumvira inama agīriwe.

¹⁶Ishavu ry’igipfu rica riboneka ako kanya, Arik’ uwitonda iy’atutswe arirengagiza.

¹⁷Ūvuga ukuri yerekana ukugororoka, Arikw icabona c’ibinyoma cerekana ubugunge.

¹⁸Har’ ūvuga ibisunitswe n’ impwemu bimeze nk’ugucumita kw’inkota, Arik’ ururimi rw’abanyabgenge ruravūra.

¹⁹Umunwa w’ukuri uzokomezwa gushitsa ibihe bidashira, Arik’ ururimi rw’ibinyoma n’urw’ akanya gato.

²⁰Ubugunge buri mu mitima y’abaja imigabo y’ikibi, Arikw abaja inama z’amahoro bagira umunezero.

²¹Nta cago kizoba ku mugororotsi, Arikw abanyakibi buzuye ibibi.

²²Iminwa y’ibinyoma n’igisesema k’Uhoraho, Arikw abakora ivy’ ukuri ni bo bamuhimbara.

²³Uwitonda ahisha ivyo azi, Arik’ umutima w’ibipfu uswaganya ubupfu.

²⁴Ukuboko kw’abanyamwete kuzoganza, Arik’ umunyabute azoshirwa mu buja.

²⁵Amaganya yo mu mutima w’umuntu awutera kwicurikīra, Arikw ijambo ryiza rirawunezereza.

²⁶Umugororotsi arōngōra mugenzi we, Arikw inzira y’abanyakibi irabazimiza.

²⁷Umunyabute ntatara inyama z’ico yahīze, Arikw ikintu c’igiciro ku muntu n’umwete.

²⁸Mu nzira y’ukugororoka har’ ubugingo, Kandi mu ndari yakwo nta rupfu ruhaba.