Read Bibliya Yera 1951 Imigani 13 Bible Online

Imigani 13 - Bibliya Yera 1951 bible

Imigani 13

¹Umwana w’ubgenge ashira umutima ku gutozwa indero nziza na se, Arik’ umucōkōranyi ntiyumvira igihano.

²Umuntu azorya ivyiza abiheshejwe n’ibivuye mu kanwa kiwe, Arikw ingunge zifuza kugira amanyama.

³Ūrinda akanwa kiwe azigama ubugingo bgiwe, Arikw ikirofoke kizoranduka.

⁴Umutima w’umunyabute urifuza, ariko nta co uronka, Arik’ umutima w’abanyamwete uratotahara.

⁵Umuntu agororotse yanka ibinyoma, Arik’ umuntu w’umunyakibi n’agatētereza kandi n’agaterasoni.

⁶Ubugororotsi buzigama ūgenda agororotse, Arikw ikibi gitsinda hasi umunyavyaha.

⁷Har’ uwifata rutunzi ata co afise, Har’ uwifata rworo kand’ afise ibitayega.

⁸Ico umuntu yicunguza n’ itunga ryiwe, Arik’ umworo ntiyicura imikankamo.

⁹Umuco w’abagororotsi n’akanyamuneza, Arikw itara ry’abanyakibi rizozimwa.

¹⁰Ubgibone butera imitongano gusa, Arik’ ubgenge bubana n’ abemera inama nziza.

¹¹Ubutunzi buronkeshejwe amagambo atagira ikimazi bugenda buyōka, Arik’ ūrundanya yitonze azokwunguka.

¹²Ivyizigiwe bigateba, bivuna umutima, Arikw icifujwe iyo gishitse, kiba igiti c’ubugingo.

¹³Umuntu wese akēngēra ijambo yikwegera guhona, Arik’ uwubaha icagezwe azohērwa.

¹⁴Ibgirizwa ry’umunyabgenge n’ isōko y’ubugingo, Rikūra mu mitego y’urupfu.

¹⁵Gukerebuka kwiza gutera igikundiro, Arikw inzira y’ingunge irababazanya.

¹⁶Uwitonda wese akorana ubgenge, Arikw igipfu canda ubupfu bgaco.

¹⁷Intumwa mbi igwa mu vyago, Arikw intumwa yizigirwa izana gukira.

¹⁸Ubgoro n’ibitētērwa bizoba ku wanka gutozwa indero nziza, Arik’ uwumvira igihano azokwubahwa.

¹⁹Icifujwe kigashika kiryohera umutima, Arikw ibipfu, kuri vyo kirazira ko biva mu bibi.

²⁰Gendana n’abanyabgenge, nawe uzogira ubgenge, Arik’ ūcudika n’ibipfu azokomereka.

²¹Ivyago bikurikirana abanyavyaha, Arikw abagororotsi bazohērwa ivyiza.

²²Umunyangeso nziza araga n’ abuzukuru, Arik’ ubutunzi bg’umunyavyaha buba buziganirijwe umugororotsi.

²³Har’ indya nyinshi mu ndimiro z’imisito y’aboro, Ariko har’ abo zononekara kubgo kudakora ibiroranye kwabo.

²⁴Ūrinda umwana inkoni aba amwanse, Arik’ ūmukunda amuhana hakiri kare.

²⁵Umugororotsi ararya, umutima ugahāga, Arikw inda z’abanyakibi zamana inzara.