Read Bibliya Yera 1951 Imigani 14 Bible Online

Imigani 14 - Bibliya Yera 1951 bible

Imigani 14

¹Umugore wese w’ubgenge yubaka urugo rwiwe, Arik’ uw’ igipfu arusambuza amaboko yiwe ubgiwe.

²Ūgendera mu bugororotsi bgiwe yubaha Uhoraho, Arik’ ūgoramangika inzira ziwe aba amukēngereye.

³Akanwa k’igipfu kamera inkoni yo gukubita ubgibone bgaco, Arikw iminwa y’abanyabgenge irabazigama.

⁴Ah’ inka zitari ikigega cama gusa, Arik’ ukugwira kw’ibirimwa kuva ku nkomezi z’inka.

⁵Icabona cizigirwa ntikibesha, Arikw icabona c’ibinyoma kivuga ibinyoma.

⁶Umucokoranyi arondera ubgenge ntabubone, Arik’ ukumenya kuroroshe ku muntu akerebutse.

⁷Va imbere y’igipfu, Kukw ata minwa y’ubgenge uzomubonana.

⁸Ubgenge bg’uwitonda bumumenyesha inzira yiwe, Arik’ ubupfu bg’ibipfu burabihenda.

⁹Ibipfu bikinisha icaha, Mu bagororotsi har’ ugushimwa.

¹⁰Umutima wimenyera uwawo mubabaro, Kand’ umunezero wawo umunyamahanga ntashobora kuwītamwo.

¹¹Inzu y’abanyakibi izoheneberezwa, Arik’ urugo rw’abagororotsi ruzogira umugisha.

¹²Harih’ inzira umuntu yibgira kw ari nziza, Arikw amaherezo yayo n’ inzira ishikana mu rupfu.

¹³No mu gutwenga umutima ushobora kubabara, Kand’ iherezo ry’ibitwengo rikaba amaganya.

¹⁴Ūsubira inyuma mu mutima wiwe azohāzwa n’inzira ziwe ubgiwe, Umuntu mwiza na we azohāzwa n’ibikorwa vyiwe.

¹⁵Imburabgenge yemera ijambo ryose, Arik’ umunyamakenga agenda agavye.

¹⁶Umuntu w’ubgenge ariyubara, agahunga ibibi, Arikw igipfu cidudarika, kikiremesha.

¹⁷Ikirandamuke gikora ivy’ ubupfu, Kand’ umuntu w’akazīkira baramwanka.

¹⁸Imburabgenge ziragwa ubupfu, Arikw abanyamakenga bambikwa ibitsibo vy’ubgenge.

¹⁹Ababi bacira bugufi abeza, N’abanyavyaha bicisha bugufi ku marembo y’abagororotsi.

²⁰Umworo arankwa gushitsa no ku mubanyi, Arik’ umutunzi agira abakunzi benshi.

²¹Ūkēngēra umubanyi aba acumuye, Arik’ ūgirira akagongwe impahazwa aba ahiriwe.

²²Abigenera ikibi mbega ntibaba bazimiye? Arikw abigenera iciza, imbabazi n’ukuri bizobazako.

²³Ubutame bg’ibikorwa vyose bugira umugwiza, Ariko gupfa kubomboranya amanwa kuzana ubgoro gusa.

²⁴Igitsibo c’abanyabgenge n’ ubutunzi bgabo, Arik’ ubupfu bg’ibipfu n’ ubupfu nyene.

²⁵Icabona c’ukuri kirokora ubugingo bg’abantu, Arik’ ūvuga ibinyoma arabaroha.

²⁶Kwubaha Uhoraho n’icizigiro gikomeye, Kand’ abana biwe bazogira ubuhungiro.

²⁷Kwubaha Uhoraho n’isōko y’ubugingo, Gukūra mu mitego y’urupfu.

²⁸Icubahiro c’umwami giterwa n’ubginshi bg’abantu, Arik’ uguhenebera kwa segaba guterwa no kubura abantu.

²⁹Ūteba kuraka aba ar’ umunyabgenge bginshi, Arikw ikirandamuke cīhaya ubupfu.

³⁰Umutima utekereje ni bgo bugingo bg’umubiri, Arikw ishari ni nk’ikimungu co mu magufa.

³¹Ūnyikije umugorwa aba agaye Umuremyi wiwe, Arik’ ūgirira ikigongwe agakene, uwo we aba amwubashe.

³²Umunyakibi atsindwa hasi n’ugukora nabi kwiwe, Arik’ umugororotsi agira ivyizigiro mu rupfu rwiwe.

³³Ubgenge buguma mu mutima w’umuntu azi gutahura, Arikw ikir’ imbere mu nda y’ibipfu gica kimenyekana.

³⁴Ubugororotsi bushira ihanga hejuru, Arikw icaha gitukisha amoko.

³⁵Umwami atonesha umusavyi w’ubgenge, Arik’ uburake bgiwe buba ku muntu akora ibiterasoni.