Read Bibliya Yera 1951 Imigani 15 Bible Online

Imigani 15 - Bibliya Yera 1951 bible

Imigani 15

¹Ukwishura kwiyoroheje guhwama uburake, Arikw ijambo ribabaza rivyura ishavu.

²Ururimi rw’abanyabgenge rutonyanga ubgenge bubereye, Arikw akanwa k’ibipfu gasuka ubupfu.

³Inyonga z’Uhoraho zir’ ahantu hose, Zītegereza ababi n’abeza.

⁴Ururimi rwiza n’igiti c’ubugingo, Arik’ urugoreka n’akavunamutima.

⁵Igipfu gikēngēra gutozwa indero nziza na se, Arik’ uwumvira igihano arakerebuka.

⁶Mu nzu y’umugororotsi haba ubutunzi bginshi, Ariko mu nyungu z’umunyakibi habamw’ amagorwa.

⁷Iminwa y’abanyabgenge ikwiza ubgenge, Arik’ umutima w’ibipfu si k’umeze.

⁸Ikimazi abanyakibi batanga n’ igisesema k’Uhoraho, Arikw ahimbarwa n’ugusenga kw’abagororotsi.

⁹Inzira y’umunyakibi n’igisesema k’Uhoraho, Arikw akunda ūkurikira ubugororotsi.

¹⁰Har’ igihano gihambaye ku muntu ata inzira, Kand’ uwanka guhanwa azopfa.

¹¹I kuzimu n’amahonero bigaragarira Uhoraho, Non’ imitima y’abana b’abantu ntirushirije kumugaragarira?

¹²Umucokoranyi ntakunda igihano, Kandi ntagendera abanyabgenge.

¹³Umutima unezerewe ukesha mu maso, Arik’ umubabaro wo mu mutima usāvya umushaha.

¹⁴Umutima w’ūfise ubgenge urondera kumenya, Arikw akanwa k’ibipfu kandavura ivy’ ubupfu.

¹⁵Imisi y’umunyamubabaro ni mibi yose, Arik’ uw’ umutima ukeye yamana ibinoboye.

¹⁶Ibike birimwo kwubaha Uhoraho Biruta ubutunzi bginshi burimwo guhagarika umutima.

¹⁷Ingaburo y’imboga irimw’ urukundo Iruta inyama z’inka inuze zirimw’ urwanko.

¹⁸Umuntu w’inkazi avyura ibihāri, Arik’ ūteba kuraka ahwamika imitongano.

¹⁹Inzira y’umunyabute ni nk’ umurombero w’amahwa, Arikw inzira y’abagororotsi n’ umuharuro.

²⁰Umwana w’ubgenge anezereza se, Arik’ umuntu gito akēngēra nyina.

²¹Ubupfu bunezereza igipfamutima, Arik’ umuntu w’ubgenge atunganya ingendo ziwe.

²²Ahatagira inama imigabo irapfa, Ariko mu bajanama benshi irakomera.

²³Umuntu anezererwa ukwishura kw’akanwa kiwe, Kand’ ijambo riziye mu gihe kibereye, ewe kuntu ari ryiza!

²⁴Ku munyabgenge inzira y’ ubugingo idūga irora hejuru, Kugira ngw atandukane n’i kuzimu i bgina.

²⁵Uhoraho asambura inzu y’ umwibone, Arikw akomeza urubibe rw’ umupfakazi.

²⁶Akazīkira n’igisesema k’Uhoraho, Arikw amajambo y’igikundiro imbere yiwe ntagira akarohe.

²⁷Umuntu ahahamira inyungu atera imivurungano inzu yiwe, Arik’ uwanka ingurire azoramba.

²⁸Umutima w’umugororotsi witondera ivyo wishura, Arikw akanwa k’abanyakibi gasuka ibibi.

²⁹Uhoraho aba kure y’abanyakibi, Ariko yumva ugusenga kw’ abagororotsi.

³⁰Mu maso hakeye hanezereza umutima, Kand’ inkuru nziza zishira imisokōro mu magufa.

³¹Ūtega ugutwi ngo yumve uguhanūrwa kumushitsa ku bugingo Azobana n’abanyabgenge.

³²Uwanka guhanwa aba akēngereye ubgiwe bugingo, Arik’ uwumvira ivyo ahanūwe aronka ubgenge.

³³Ukwubaha Uhoraho kwigisha ubgenge, Kand’ ukwicisha bugufi kwitangira imbere y’ukwubahwa.