Read Bibliya Yera 1951 Imigani 16 Bible Online

Imigani 16 - Bibliya Yera 1951 bible

Imigani 16

¹Inama umutima wigeneye n’iy’ umuntu, Arikw ivyo ururimi rwishura biva k’Uhoraho.

²Ingendo zose z’umuntu ziba izitunganye mu maso yiwe ubgiwe, Arik’ Uhoraho agera imishaha ku munzane.

³Uremeke Uhoraho ibikorwa vyawe, Ni ho imigabo yawe izokomera.

⁴Uhoraho yaremye ikintu cose ngo kigire ico gikora, Mbere n’abanyakibi na bo yabashizeho ngo babone umusi mubi.

⁵Umuntu wese w’ubgibone mu mutima n’igisesema k’Uhoraho; Vy’ukuri akazobura guhanwa!

⁶Ibigabitanyo bikūrwaho n’ imbabazi n’ukuri, Kand’ abantu bakūrwa mu bibi no kwubaha Uhoraho.

⁷Inzira z’umuntu iyo zihimbaye Uhoraho Atuma n’abansi biwe buzura na we.

⁸Ibike birimw’ ubugororotsi Biruta inyungu nyinshi zirimwo kugabitanya.

⁹Umutima w’umuntu wigerera inzira yiwe, Arik’ Uhoraho ni we atumbereza ibirenge vyiwe.

¹⁰Amajambo y’ubumenyi ari mu minwa y’umwami, Akanwa kiwe nta ho kagoramika imanza.

¹¹Ibigeresho n’iminzane bishitse n’ivy’ Uhoraho, Amabuye yose agera yo mw isaho n’igikorwa ciwe.

¹²N’ikizira ku bami gukora ikibi, Kukw ingoma ikomezwa n’ ubugororotsi.

¹³Abami bahimbarwa n’iminwa y’ubugororotsi, Kandi bakunda ūvuga ibiroranye.

¹⁴Uburake bg’umwami ni nk’ intumwa zo kugeseza, Arik’ umuntu w’umunyabgenge arabuhwamika.

¹⁵Mu nyonga h’umwami iyo hakeye haba ubugingo, Kandi gutonesha kwiwe ni nk’igicu kigwa imvura y’ agatāsi.

¹⁶Ewe kuronka ubgenge ukuntu kuruta kuronka izahabu! Mbere guca ubgenge n’ico guhitamwo kuruta ifeza.

¹⁷Inzira y’igihamo y’abagororotsi n’ukwitandukanya n’ikibi; Uwirinda mu nzira yiwe akiza ubugingo bgiwe.

¹⁸Ubgibone bgitangira imbere y’uguhona, Kand’ umutima wihaya witangira imbere y’ukugwa.

¹⁹Kugira umutima wicishije bugufi ugafatanya n’abagorwa Biruta kugabangana iminyago ufatanije n’abibone.

²⁰Ūshira umutima kw ijambo azobona ivyiza, Kand’ uwizigira Uhoraho aba ahiriwe.

²¹Uw’ ubgenge mu mutima azokwitwa umukerebutsi, Kandi n’iminwa ivuga ibiryoshe yungura ubgenge.

²²Ugutahura n’isōko y’ubugingo k’ūgufise, Kand’ igihana ibipfu n’ubupfu bgavyo.

²³Umutima w’umunyabgenge wigisha akanwa kiwe, Ukungura ubgenge bg’iminwa yiwe.

²⁴Amajambo aryoshe ni nk’ umutsāma w’ikigigu, Asōsera umutima, anonora amagufa.

²⁵Harih’ inzira umuntu yibgira kw ari nziza, Arikw amaherezo yayo n’inzira ishikana mu rupfu.

²⁶Inda y’ūkora ni yo imukoresha, Kukw akanwa kiwe kamusaba.

²⁷Umuntu w’umugarariji yimba ivyago, Kandi mu minwa yiwe harimw’ umuriro w’inkazi.

²⁸Umuntu w’ikigoryi yandurutsa intonganya, Kand’ ūneguranira mu vyongorerano atandukanya abakundana cane.

²⁹Umuntu w’ikirara yosha mugenzi we, Amujana mu nzira itari nziza.

³⁰Ūteranya amaso ngo yigerere ibigoramye, Agafumbanya iminwa, ni we ashitsa ibibi.

³¹Imvi ku mutwe n’igitsibo c’ icubahiro, Kiboneka mu nzira y’ubugororotsi.

³²Ūteba kuraka aruta umunyenkomezi, Kand’ ūganza umutima wiwe aruta ūnesheje igisagara.

³³Utwo bapfindisha baduterera mu mpuzu zo mu gikiriza, Arik’ uko bigenda kwose bigerwa n’Uhoraho.