Read Bibliya Yera 1951 Imigani 17 Bible Online

Imigani 17 - Bibliya Yera 1951 bible

Imigani 17

¹Indumange irimw’ amahoro Iruta ibinoboye vyuzuye inzu birimw’ imitongano.

²Umushumba w’ubgenge bazomureresha umwana w’ agatētereza, Kand’ azogira umugabane mu biragwa hamwe na ben’ umwandu.

³Inkono yo mu ruganda iteka ifeza, n’umuriro uvugutira izahabu, Arik’ ūgerageza imitima n’ Uhoraho.

⁴Inkozi y’ikibi ishira umutima ku minwa y’ibibi, Kand’ umunyabinyoma atega ugutwi ururimi rw’akazīkira.

⁵Ūcokora umworo aba agaye Umuremyi wiwe, Kand’ ūnezerezwa n’ivyago vy’ uwundi ntazobura guhanwa.

⁶Abuzukuru ni bo gitsibo c’ abatāma, Kand’ icubahiro c’abana ni ba se.

⁷Amajambo aroranye kw’atabereye igipfu, Non’ iminwa y’ibinyoma ntirushirije kuba iyitabereye ku mupfa soni?

⁸Ingabire ni nk’akabuyenge k’ igiciro kinini mu maso y’ ūyihawe, Ah’ agiye hose agira ukuboko kwiza.

⁹Ūpfuka igicumuro aba arondera urukundo, Arik’ ūhoza ikintu mu kanwa atandukanya abakundana cane.

¹⁰Umuntu afise ubgenge iy’ ahambariwe bimushika kure Kurusha ukw inkoni ijana zishika ku gipfu.

¹¹Umuntu w’umunyakibi arondera ubugarariji gusa, Arik’ umutahe w’imburakigongwe azotumwa kuri we.

¹²Umuntu yopfuma ahūra n’ igikōko citwa idubu ciciwe ibibgana vyaco, Hakw ahūrira n’igipfu mu bupfu bgaco.

¹³Uwishura iciza ikibi, Ikibi ntikizoruha kiva ku nzu yiwe.

¹⁴Gutangura imitongano ni nko kugomorora amazi, Nuko reka ibirake utarasinda.

¹⁵Ūtsindanishiriza umunyakibi, bo n’ūtsindisha umugororotsi Bompi nyene n’igisesema k’ Uhoraho.

¹⁶Igipfu bikimariye iki kugira ibiguzi mu ntoke ngo kigure ubgenge, Kandi kitagira umutima?

¹⁷Umukunzi akundana ibihe vyose, Kandi yavukiye kukubera nk’ uwo muvukana mu magorwa.

¹⁸Umuntu atagira umutima yishira mu ndahiro, Akigira ishinga imbere ya mugenzi we.

¹⁹Ūkunda gutongana aba akunda kugabitanya; Uwubaka ibirimba kw irembo ryiwe aba yikwegeye kugesezwa.

²⁰Ūfise umutima udadika nta ciza abona, Kand’ ūfise ururimi rudambikanya agwa mu vyago.

²¹Ūvyaye igipfu aba yizaniye intuntu, Kandi se w’ikijuju nta munezero agira.

²²Umutima unezerewe n’umuti ukiza, Arik’ umutima usāvye wumisha amagufa.

²³Umuntu w’umunyakibi agoborora ingurire mu kwaha Kugira ngw agoreke inzira z’ imanza.

²⁴Ubgenge bur’ imbere y’ūkerebutse, Arikw amaso y’igipfu agenda ajarajara gushitsa ku mpera z’isi.

²⁵Umwana w’igipfu n’umubabaro kuri se, Kandi n’agaterantuntu kuri nyina yamuvyaye.

²⁶Si vyiza gucira igihano umugororotsi, Canke gukubitira abapfasoni ubugororotsi bgabo.

²⁷Ūvuga make aba ar’ ubgenge, Kand’ umugwaneza aba ar’ umuntu afise umutima.

²⁸N’igipfu na co, iyo ciyihorereye, bacita umunyabgenge, Iyo kibumvye iminwa bacita uwitonda.