Read Bibliya Yera 1951 Imigani 18 Bible Online

Imigani 18 - Bibliya Yera 1951 bible

Imigani 18

¹Uwigungira ukwiwe aba arondera ivyo yiharije gusa, Kand’ arwanya inama nziza zose.

²Igipfu ntigihimbarwa n’ubgenge, Ariko gihimbarwa no kwiyerekana uko kimeze mu mutima.

³Umunyakibi iy’ aje, ukugayana kuba kuje, Kand’ agatētereza kazanana n’ ibitutsi.

⁴Amajambo yo mu kanwa k’ umuntu ni nk’amazi y’ibenga, Isōko y’ubgenge ni nk’akūzi gasūma.

⁵Mu manza si vyiza gutinya umunyakibi ku kigohe, Canke gutsindisha umugororotsi.

⁶Iminwa y’igipfu ija mu bihāri, Kand’ akanwa kaco kagihamagarira inkoni.

⁷Akanwa k’igipfu ni kwo kuranduka kwaco, Kand’ iminwa yaco ni yo mutego w’ubugingo bgaco.

⁸Amagambo y’ūneguranira mu vyongorerano ni nk’ivyo kurya biryoshe, Bimanuka bija epfo mu nda.

⁹Kand’ ūdeha mu gikorwa ciwe Aba ar’ incuti y’ūtikiza.

¹⁰Izina ry’Uhoraho n’umunara ukomeye: Umugororotsi awirukiramwo, akaba amahoro.

¹¹Itunga ry’umutunzi kuri we n’igisagara gikomeye, Uko yiyumvira ni nk’uruzitiro rugera hejuru.

¹²Uwishira hejuru mu mutima, agatikizo azogasanga imbere, Kand’ ukwicisha bugufi kuzosanga imbere icubahiro.

¹³Ūwishura atarumva Bimubera ubupfu n’agatētereza.

¹⁴Umutima w’umuntu umushigikira mu magara make, Arik’ umutima wihebuye ni nde yoshobora kuwuremesha?

¹⁵Umutima w’umukerebutsi uronka ubgenge, N’ugutwi kw’abanyabgenge na kwo ni co kurondera.

¹⁶Ishikanwa ry’umuntu rimuronkera akayira, Rimushitsa imbere y’abahambaye.

¹⁷Ūbanza kwitwara, umengo ni we afise urubanza, Arik’ uwo babūrana yaza akamwararaza.

¹⁸Ubupfindo bumara ibihāri, Kandi butātūra abakomeye.

¹⁹Uwo muvukana iy’ umukomeretseko bigora kumugarura kurusha kunesha igisagara gikomeye, Kand’ ibitāti ben’ ivyo bimeze nk’ibihindizo vyugara inzu y’igihome.

²⁰Inda y’umuntu ihāzwa n’ibivuye mu kanwa kiwe, Kand’ azohāga ukugwira kwo mu minwa yiwe.

²¹Urupfu n’ubugingo biri mu bubasha bg’ururimi, Kand’ abarukunda bazorya ivyo rwamye.

²²Ūronse umugore aba aronse ikintu ciza, Kand’ aba aronse ingabire k’ Uhoraho.

²³Umworo akoma ibōbo, Arik’ umutunzi we yishurana ubugabo.

²⁴Ūcuditse na benshi aba yizaniye guhenebera, Ariko har’ umukunzi yimatanya n’umuntu kurusha ūvukana na we.