Read Bibliya Yera 1951 Imigani 19 Bible Online

Imigani 19 - Bibliya Yera 1951 bible

Imigani 19

¹Umworo agendera mu gutungana kwiwe Aruta uw’ iminwa idambikanya kandi w’igipfu.

²Ikindi, umutima kutagira ubgenge si vyiza, Kand’ ūgenda yihutagiza ahusha inzira.

³Ubupfu bg’umuntu bugoramika inzira yiwe, Kand’ umutima wiwe ugirira Uhoraho umwikomo.

⁴Ubutunzi bugwiza abagenzi, Arik’ umworo we, umugenzi yitandukanya na we.

⁵Icabona c’ibinyoma ntikizobura guhanwa, Kand’ ūvuga ivy’ ubuhūmvyi ntazokira.

⁶Benshi bashemagiza ūtanga isābagire, Kand’ umuntu wese aba umugenzi w’ūkunda kugaba.

⁷Umworo we, abavukana na we bose baramwanka: Non’ abagenzi biwe ntibarushiriza kumwiyambura? Akoma ibōbo inyuma yabo, na bo bakīgīra.

⁸Ūwironkera ubgenge aba akunda ubugingo bgiwe, Kand’ ūzigama ubukerebutsi bgiwe azobona ivyiza.

⁹Icabona c’ibinyoma ntikizobura guhanwa, Kand’ ūvuga ivy’ ubuhūmvyi azoranduka.

¹⁰Kudibama ntikubereye igipfu, Non’ umushumba kuganza abaganwa ntikurushirije kutabera?

¹¹Kwitonda kw’umuntu kumutera guteba kuraka, Kand’ icubahiro ciwe n’ukwirengagiza ico yacumuweko.

¹²Uburake bg’umwami ni nk’ ukwivuga kw’intambge, Arikw ineza yiwe ni nk’ikime gihēmbūra ivyatsi.

¹³Umwana gito n’icago kuri se, Kand’ ugutongana kw’umugore ni nk’amatonyanga adahengeshanya.

¹⁴Urugo bo n’itunga umuntu abiragwa n’abavyeyi, Arik’ umugore aciye ubgenge amuhabga n’Uhoraho.

¹⁵Ubunebge butera itiro ryinshi, Kand’ umunyabute azogira inzara.

¹⁶Uwitondera icagezwe aba azigamye ubugingo bgiwe, Arik’ ūtitwaririka inzira ziwe azopfa.

¹⁷Ūgirira akagongwe umugorwa aba agurānye Uhoraho, Kand’ ukugira neza kwiwe azokumwishura.

¹⁸Hana umwana wawe igihe c’ ivyizigiro kitararengerana, Ariko ntutwarwe n’ishavu ng’ umwice.

¹⁹Umuntu w’ishavu ryinshi azorihōrwa, Kandi naho womutabara uzoba ukwiye gusubīra.

²⁰Wumvire inama, wemere kwigishwa, Kugira ng’ ube umunyabgenge mu bihe vyo hanyuma.

²¹Mu mutima w’umuntu haba imigabo myinshi, Arikw inama y’Uhoraho ni yo izoguma.

²²Ineza y’umuntu ni yo ituma akundwa, Wopfuma uba umworo hak’ uba umubeshi.

²³Kwubaha Uhoraho kuzana ubugingo, Kand’ ūmwubaha azorāra ahāze; Ivyago ntibizomutera.

²⁴Ikiremare kirokeza ukuboko mu nkōko, Ntikinagukūreyo ngo kikuzane ku munwa.

²⁵Kubita umucokoranyi, maz’ imburabgenge izokerebuka, Uhanūre ūri n’umutima, na we azotahura ubgenge.

²⁶Ūnyaga se akirukana nyina N’umwana w’agatētereza kandi w’agatukisha.

²⁷Mwana wanje, reka kurinda kwumviriza gutozwa indero nziza, Namb’ ugomba guta amajambo y’ubgenge.

²⁸Icabona c’ikidambidambi gitwengera imanza mw ijigo, Kand’ akanwa k’abanyakibi kamira miyonzwa ibigabitanyo.

²⁹Ibihano vyagerewe abacokoranyi, Kandi n’inkoni zagerewe ibitugu vy’ibipfu.