Read Bibliya Yera 1951 Imigani 2 Bible Online

Imigani 2 - Bibliya Yera 1951 bible

Imigani 2

¹Mwana wanje, ni wemera amajambo yanje, Ukabīka amabgirizwa yanje muri wewe,

²Bigatuma utega ugutwi ubgenge, Ugashira umutima ku gutahura;

³Mbere ni wahamagara ubgenge, Ugashira ijwi hejuru uririra ugutahura;

⁴Ni waburondera nk’ifeza, Ukabusesangura nk’ūrondera izahabu zanyegejwe;

⁵Ni ho uzotahura ukwubaha Uhoraho ukw ari kwo, Ukaronka ukumenya Imana.

⁶Kuk’ Uhoraho atanga ubgenge, Mu kanwa kiwe havamw’ ukumenya n’ugutahura.

⁷Abīkira abagororotsi ubgenge buroranye, Ni we nkinzo y’abagenda batunganye.

⁸Kugira ngw arinde inzira z’ imanza ziroranye, Kand’ azigame urugendo rw’ abayoboke biwe.

⁹Ni ho uzotahura ubugororotsi n’imanza ziroranye, N’ibitunganye, mbere n’inzira nziza yose.

¹⁰Kuk’ ubgenge buzokwinjira mu mutima wawe, Kand’ ukumenya kuzohimbara ubugingo bgawe.

¹¹Amakenga azogushibamira, Ugutahura kuzokuzigama,

¹²Ngo bigukize inzira y’ikibi, N’abantu badadika,

¹³Bata inzira zo kugororoka, Ngo bagendere mu nzira z’ umwiza;

¹⁴Banezererwa gukora ikibi, Bahimbarwa n’ibidadi vy’ikibi;

¹⁵Inzira zabo ziragoramanze, N’ingendo zabo n’izinguzingu.

¹⁶Kandi ngo bigukize umugore w’icigenze, Mber’ igukize umunyamahangakazi ahemanisha amagambo yiwe,

¹⁷Yataye umukunzi wo mu buto bgiwe, Yibagiye isezerano ry’Imana yiwe:

¹⁸Kukw inzu yiwe ihengamiye mu rupfu, Kand’ inzira ziwe zija mu bāpfuye.

¹⁹Abaja i we nta ho bagaruka ukundi, Kandi ntibashikīra inzira z’ ubugingo.

²⁰Ni ho uzogendera mu nzira y’abagira neza, Ukitondera inzira z’abagororotsi.

²¹Kukw abagororotsi bazokwībēra mu gihugu, Kand’ abatunganye bazokwamayo.

²²Arikw abanyavyaha bazokomborwa mu gihugu, Kand’ abaguranyi bazorandurwa muri co.