Read Bibliya Yera 1951 Imigani 20 Bible Online

Imigani 20 - Bibliya Yera 1951 bible

Imigani 20

¹Vino ni yo mucokoranyi, ibiboreza ni vyo ruyogoyogo, Kand’ ūbidandabagiranamwo wese ntagira ubgenge.

²Ugushangashirwa kw’umwami ni nk’ukwivuga kw’ intambge, Ūmurakije aba yicishije umutwe.

³Umuntu bimubera icubahiro kwitandukanya n’imitongano, Arikw igipfu cose giterekērwa no gusinda.

⁴Mu gihe c’imbeho umunebge ntakunda kurima, Ni co gituma mw iyimbura aja gusēgerereza ntagire ico aronka.

⁵Inama yo mu mutima w’ umuntu ni nk’amazi yo hasi mw ibenga, Arik’ umuntu w’umunyabgenge arayivoma.

⁶Abantu benshi bakunda kwirata, umuntu wese akirata ukugira neza kwiwe, Non’ umwizigirwa ni nde yomubona?

⁷Umugororotsi agendera mu gutungana kwiwe, Hahirwa abana biwe azosiga.

⁸Umwami avyagiye ku ntebe y’ imanza Agosōza ikibi cose inyonga ziwe.

⁹Ni nde yoshobora kuvuga, ati Niyogeje umutima, Nihumanuye icaha canje?

¹⁰Ibilo bitangana n’ibigeresho bitangana Vyompi n’igisesema k’Uhoraho.

¹¹Kandi n’umwana amenyekanira ku vyo akora, Kw ingeso ziwe zizotungana zikaba nziza.

¹²Ugutwi kwumva n’ijisho ribona Uhoraho ni we yabiremye vyompi.

¹³Ntugakunde kuryāmīra, kugira ng’ ubgoro ntibugutere, Kanura, ni ho uzobona ivyo kurya biguhāgije.

¹⁴Nta co kimaze, nta co kimaze! ni k’umuguzi avuga; Arikw amaze kugenda ni ho yishima.

¹⁵Izahabu ziriho, n’ubukenuke bg’utubuyenge twitwa marijani, Arikw iminwa y’ubgenge aba ar’ utugenegene tw’igiciro.

¹⁶Twara impuzu y’uwishinze uwo atazi, Wake ingwati uwishinze abandi.

¹⁷Indya z’ibinyoma ziraryohera umuntu, Ariko hanyuma zikamuhindukira urusekebuye mu kanwa.

¹⁸Imigabo yose ikomezwa n’ inama, Kandi mu kuja mu ntambara urōngōrwe n’inama y’ubgenge.

¹⁹Ūgendagenda ar’ indanyangu amena amabanga, Nuko ntukifatanye n’ikirofoke.

²⁰Ūvuma se canke nyina Itara ryiwe rizozimirizwa mu mwiza w’umuzitanya.

²¹Umwandu utoranywe mu maguru masha, Hanyuma nta mugisha ugira.

²²Ntukavuge, uti Nzokwihōra ikibi nagiriwe: Ni witege Uhoraho, ni we azogukiza.

²³Ibilo bitangana n’igisesema k’Uhoraho, Kand’ umunzane w’ibinyoma si mwiza.

²⁴Urugendo rw’umuntu ruva k’ Uhoraho; Non’ umuntu buntu yotahura inzira yiwe ate?

²⁵N’umutego ku muntu gupfa gutuntumukana ikintu, akavuga, ati N’icera, Maz’ ahejeje kwishira mw isezerano, akībaza.

²⁶Umwami w’ubgenge akebanya abanyakibi, Akabanywagisha ikibando.

²⁷Impwemu yo mu muntu n’ itara ry’Uhoraho, Risesangura hose mu bgigobeko bg’umutima.

²⁸Imbabazi n’ukuri ni vyo bizigama umwami, Kand’ ingoma yiwe ihangamishwa n’imbabazi.

²⁹Ubutōre bg’imisore ni bgo nkomezi zabo, Kand’ icubahiro c’abatāma n’imvi.

³⁰Inkoni ziciye inguma zivūra ikibi, Bo n’imimyore inyengetereye imbere mu mutima.