Read Bibliya Yera 1951 Imigani 21 Bible Online

Imigani 21 - Bibliya Yera 1951 bible

Imigani 21

¹Umutima w’umwami uri mu kuboko kw’Uhoraho nk’umugende w’amazi; Awukwegera ah’ agomba hose.

²Inzira yose y’umuntu iba nziza mu maso yiwe ubgiwe, Arik’ Uhoraho agera imitima ku munzane.

³Gukora ivy’ ukugororoka no guca izibereye Ni vyo bihimbara Uhoraho kurusha gutanga ibimazi.

⁴Ijisho ry’agakēngērwe n’umutima w’ubgibone Bo n’itara ry’abanyakibi n’ icaha.

⁵Ivyiyumviro vy’umunyamwete bizana ubukenuke gusa, Arik’ umuntu wese ahutagiza bimuzanira ubukene gusa.

⁶Kuronkesha ubutunzi ururimi rw’ibinyoma Ni nk’umuyaga uhita; ababurondera baba barondeye urupfu.

⁷Amanyama y’abanyakibi azobavumbura, Kuko banse gukora ibiroranye.

⁸Inzira y’ūremerewe n’ibigabitanyo iba igoramanze, Arik’ ūtunganye we, igikorwa ciwe kiba kigororotse.

⁹Wopfuma wībēra hanze,[1] Hak’ ubana n’umugore w’ ingāre mu nzu.

¹⁰Umutima w’umunyakibi wifuza ikibi; Amaso yiwe ntagirira imbabazi mugenzi we.

¹¹Umucokoranyi iy’ ahanwe imburabgenge ica ubgenge, Kand’ umunyabgenge iy’ atojwe indero nziza arakerebuka.

¹²Har’ umugororotsi yitegereza inzu y’umunyakibi, Ari we acuranguriza abanyakibi mu mahonero.

¹³Uwiziba amatwi umugorwa atakamba, Na we nyene azotakamba ntiyumvirizwe.

¹⁴Impēra yo mu kinyegero ihwamika uburake, N’ingurire igoborowe mu kwaha ihwamika ishavu ryinshi.

¹⁵Imanza ziroranye zibera umugororotsi umunezero, Arikw abakora ivy’ ukugabitanya zibabera akaranduramutima.

¹⁶Umuntu ahusha inzira y’ ubgenge Itahiriro ryiwe ni mw ikoraniro ry’abāpfuye.

¹⁷Uwishinga akayāgīriro azocika umukene, Kand’ inkunzi ya vino n’amavuta ntizoba umutunzi.

¹⁸Umunyakibi aba incungu y’ umugororotsi, Kand’ igihemu kigwa mu mpōrero y’aberanda.

¹⁹Wopfuma uba mu gihugu c’ ubugaragwa, Hak’ ubana n’umugore w’ ingāre yitoraguza.

²⁰Mu rugo rw’umunyabgenge har’ ubutunzi bg’igiciro kinini n’amavuta, Arikw igipfu co, kirabirokagiza.

²¹Uwitwaririka ivy’ ubugororotsi n’imbabazi Aronka ubugingo n’ubugororotsi n’icubahiro.

²²Umunyabgenge yūrira inzitiro z’igisagara c’abahizi, Agasangangura ibikomeye bāri bizigiye.

²³Ūrinda akanwa kiwe n’ururimi rwiwe, Umutima wiwe aba awurinze amagorwa.

²⁴Umwibone yihayagiza, izina ryiwe ni Mucokoranyi; Akorana ubugabo bg’ubgibone.

²⁵Ukwifuza kw’umunyabute kuramwica, Kukw amaboko yiwe yanka kuruha.

²⁶Har’ uwifuza afise igihahamizi bukarinda bgira, Arik’ umugororotsi atanga ata kinubge.

²⁷Ikimazi abanyakibi batanga kirasesema: Mbeg’ iy’ akizananye umutima mubi, ntikirushiriza kuba igisesema?

²⁸Icabona c’ibinyoma kizoranduka, Arik’ umuntu yumva neza azovuga ata kimutēsha.

²⁹Umuntu w’umunyakibi nta dusoni agira mu maso, Arik’ umugororotsi yitondera inzira ziwe.

³⁰Ubgenge cank’ ukumenya Cank’ inama, biba ar’ ubusa imbere y’Uhoraho.

³¹Ifarasi itegurirwa umusi w’ intambara, Arik’ ukunesha kuva k’Uhoraho.