Read Bibliya Yera 1951 Imigani 23 Bible Online

Imigani 23 - Bibliya Yera 1951 bible

Imigani 23

¹Ni wicara gusangira n’ūganza, Ushinge ijisho uyo ar’ imbere yawe.

²Asangwa ur’ umuntu w’inda ndende Wigarure, nk’ūhirikiwe imbugita kw izosi.

³Ntugire umutima muke mu binoboye vyiwe, Kukw ar’ ivyo kurya vy’ uruhendo.

⁴Ntiwirushe ng’ ube umutunzi, Reka kuvyigengeterereza.

⁵Mbega wogumiza ijisho ku kiriko kirarenga? Kuk’ ubutunzi butobura kumera amababa, Nk’inkukuma[2] iguruka itumbereye mw ijuru.

⁶Ntukarye ivyo kurya vy’ umunyajisho ribi, Ntugire umutima muke mu binoboye vyiwe:

⁷Kuk’ uko yiyumvira mu mutima ari kw ameze: Araguhimiriza, ngo N’urye, n’unywe; Arik’ umutima wiwe udafatanije nawe.

⁸Intore wariye uzoyidahwa, Akayāgo kawe karyoshe kazoba gapfuye ubusa.

⁹Ntugire ico uvuga ikijuju cumva, Kukw azokēngēra ubgenge bgo mu majambo yawe.

¹⁰Ntugashingūre akarimbi k’ urubibe rwa kera, Kandi ntukarye amatongo y’ impfuvyi;

¹¹Kuk’ umucunguzi wazo ar’ Inyenkomezi, Izobūrana urwazo nawe.

¹²Shira umutima ku gutozwa indero nziza, N’amatwi yawe ku majambo y’ubgenge.

¹³Ntureke guhana umwana, Kukw atokwicwa n’uk’ umukubise inkoni.

¹⁴Uz’ umukubite inkoni, Ni ho uzokiza ubugingo bgiwe ngo ntibuje i kuzimu.

¹⁵Mwana wanje, umutima wawe ni wagira ubgenge Uwanje mutima bgite uzonezerwa,

¹⁶Mber’ umushaha wanje uzohimbarwa Iminwa yawe ni yavuga ibiroranye.

¹⁷Umutima wawe woye kugirira ishari abanyavyaha, Arik’ ugire ishaka ryo kwubaha Uhoraho burinde bgira.

¹⁸Kuko vy’ukuri har’ ukuziga ibizoba, Kand’ ivyo wizigiye ntibizokūrwaho.

¹⁹Mwana wanje, wumvirize, ugire ubgenge, Urōngōre umutima wawe mu nzira.

²⁰Ntukabe mu gitigiri c’abanohowe na vino, No mu c’abanyameru y’inyama:

²¹Kukw imborerwa n’umunyameru uburuhiro ar’ ugufūtāna, Kand’ itiro rizokwambika umuntu ubucocerwa.

²²Wumvire so yakuvyaye, Kandi ntugakēngēre nyoko ashitse mu butāmakazi.

²³Gura ukuri, ntugushōre; Bo n’ubgenge n’indero nziza n’ubukerebutsi.

²⁴Se w’umugororotsi azogira akanyamuneza kenshi, N’ūvyaye umwana w’ubgenge azomunezererwa.

²⁵So na nyoko ni banezerwe, Nyoko yakuvyaye n’ahimbarwe.

²⁶Mwana wanje, mpa umutima wawe, Kand’ amaso yawe ahimbarwe n’inzira zanje.

²⁷Kuko maraya ar’ urusumanyenzi rurerure, Kand’ umugore w’icigenze n’urwobo rw’imbōmbāne.

²⁸Mber’ abunda nk’umwambuzi, Atuma abanyabihemu bagwira mu bantu.

²⁹Ni nde agira ngo Yō! Ni nde agira ngw Agwē! Ni nde afise imitongano? Ni nde afise imyidodombo? Ni nde afise inguma ata nyanduruko? Ni nde afise amaso atukuye?

³⁰N’abatavīrīra vino, N’abaja kurondera izituriranije.

³¹Ntukitegereze vino iy’ itukuye, Iy’ ica ibibatsi mu kirahuri, Igashōka neza:

³²Uburuhiro iryana nk’inzoka, Igakomora nk’imvuvyi.

³³Amaso yawe ugahava uyarābisha abagore b’ivyīgenze, Umutima wawe ukavuga ibidadi;

³⁴Mber’ ugaca umera nk’ūryamye hagati mu kiyaga, Canke nk’ūryamye ku mutwe w’umuringoti wo mu bgato.

³⁵Ukavuga, uti Bārankubise, sinababara, Bāranyegaguye, sinavyumva: Nzokwikangura ryari? Na ho nyene nzosubira kuyirondera.