Read Bibliya Yera 1951 Imigani 24 Bible Online

Imigani 24 - Bibliya Yera 1951 bible

Imigani 24

¹Ntukagirire ishari abanyakibi, Kandi ntukifuze kubana na bo:

²Kuk’ umutima wabo wiyumvira guhonnya, Kand’ iminwa yabo ikavuga ivy’ ukugira nabi.

³Ubgenge ni bgo bgubaka urugo, Kand’ ubukerebutsi ni bgo burukomeza;

⁴Guca ubgenge ni kwo kwuzuza inzu zo muri rwo Ubutunzi bgose bg’igiciro kinini kandi bg’igikundiro.

⁵Umunyabgenge aba uw’ inkomezi, Mber’ umuntu aciye ubgenge yunguka ubushobozi.

⁶Kuk’ uzoja mu ntambara urōngōwe n’inama y’ubgenge, Kandi mu nama ya benshi habonekamw’ agakiza.

⁷Ubgenge buri hejuru, busiga igipfu: Ntigikūrak’ umunwa iyo kiri mw ikombe.

⁸Uwigerera gukora ibibi Abantu bazomwita Kanyengunge.

⁹Ivyiyumviro vy’igipfu n’ivyaha, Kand’ umucokoranyi n’igisesema ku bandi.

¹⁰Ni wadendebukirwa ku musi w’ivyago Inkomezi zawe zizoba zari nke.

¹¹Urokore abo bashorewe bajanwa kwicwa, N’abagenda bacitse intege bajanwa gutikizwa, ntubure kubatabara.

¹²Ni wavuga, ut’ Erega ntitwari tubizi: Mbeg’ Ūgera imitima ku munzane ntavyiyumvira? Kand’ Ūzigama ubugingo bgawe ntabizi? Mbega ntazokwishura umuntu wese ibikwiranye n’ivyo yakoze?

¹³Mwana wanje, uz’ urye ubūki, kukw ari bgiza, N’ikigigu kikuryohera mu kanwa.

¹⁴Umenye kw ari k’ubgenge bumerera ubugingo bgawe: Asangwa warabubonye, har’ ukuziga ibizoba, Kand’ ivyo wizigiye ntibizokūrwaho.

¹⁵Ewe munyakibi, ntukabunde ku rugo rw’umugororotsi, Ntugasangangure umuhana wiwe;

¹⁶Kuk’ umugororotsi n’iyo yogwa ibihetangabo ndwi, asubira kuvyuka, Arikw abanyakibi bazogwa mu vyago.

¹⁷Umwansi wawe ni yagwa ntuz’ unezerwe, Umutima wawe woye guhimbarwa ni yatsitara:

¹⁸Uhoraho yoye guhava abibona, bikaba bibi mu nyonga ziwe, Akaroresha irya uburake yamurakiye.

¹⁹Ntugashavuzwe n’ivy’ inkozi z’ibibi, Kandi ntukagirire ishari abanyakibi:

²⁰Kukw ata kuziga ibizoba kw’umunyakibi; Itara ry’abanyavyaha rizozimwa.

²¹Mwana wanje, utinye Uhoraho, bo n’umwami, Kandi ntukifatanye n’abagarariji:

²²Kukw ivyago no kugeseza bivuye kur’ abo bompi bizoza giturumbuka, Kandi ni nde yobimenya?

²³N’aya nyene n’amajambo y’ abanyabgenge. Mu manza si vyiza gutinya abantu ku kigohe.

²⁴Ūbarira umutsindwa ng’ Uratsinze, Amoko azomuvuma, amahanga azomwanka urunuka.

²⁵Arikw abamuhana bazogirirwa neza, Umugisha n’amahirwe bizobazako.

²⁶Uwishuye ibiroranye Biba bibaye nk’indamukanyo nziza.

²⁷Tunganya ibikorwa vyawe vyo hanze, Uvyiroranirize mu ndimiro, Hanyuma uz’ ubone kwubaka inzu.

²⁸Ntukāgirize mugenzawe ata nyanduruko, Kandi ntugahendanishe iminwa yawe.

²⁹Ntukavuge, uti Nzomusubiriza mu nkōko; Nzokwishura uyo muntu ibihwanye n’ivyo yakoze.

³⁰Naciye ku ndimiro y’umunebge, No ku ruzabibu rw’umuntu atagira umutima;

³¹Nasanze hose huzuyemw’ amahwa, Hose igisuru kirenze hejuru, Uruzitiro rwaho rw’amabuye rusambūtse.

³²Ndahitegereje ndiyumvira cane, Ndabirāba, biranyigisha.

³³Guca agatiro gakeya, kuba urisinziriye gatoya, Kwisegura ukuboko gatoya wiboterere:

³⁴Uko ni k’ubgoro bgawe buzogushikako nk’umwambuzi, N’ikigoyi kizogushikako nk’ umuntu w’umurwanyi.