Read Bibliya Yera 1951 Imigani 25 Bible Online

Imigani 25 - Bibliya Yera 1951 bible

Imigani 25

¹N’iyi nyene n’imigani ya Salomo, iyo abantu ba Hezekiya umwami w’i Buyuda batoranije.

²Imana guhisha ikintu, n’ icubahiro cayo, Arikw abami bo, guserangura ikintu, ni co cubahiro cabo.

³Nk’ukw ijuru rigera hejuru cane, n’i bgina hakagera kure, Uko ni k’umutima w’abami udaserangurika.

⁴Kūra inkamba mw ifeza, Ni ho hazovamw’ urwavya rutunganye.

⁵Kūra abanyakibi imbere y’ umwami, Ni ho ingoma yiwe izohangama mu bugororotsi.

⁶Ntiwikakishe mu nyonga z’ umwami, Kandi ntukirobeke mu bahambaye:

⁷Ivyoba vyiza n’uko bokubarira, bat’ Igira hino imbere, Hako bagusubiza inyuma imbere y’ūganza, Uwo amaso yawe yiboneye.

⁸Ntukihutire kubūrana, Uburuhiro ntuz’ usange waguye mu rudubi, Mugenzawe amaze kukumāramāza.

⁹Wītātūre na mugenzawe ubgiwe, Kandi ntumenere ibanga uwundi,

¹⁰Ūvyumvise akagutuka, Ukaba wambaye ibara ritakuvako.

¹¹Ijambo rivuzwe mu buryo bubereye Ni nk’amacungwa y’izahabu ari mu tujishano tw’ifeza.

¹²Ukw impeta y’izahabu imeze, bo n’utugenegene two kwambarwa tw’izahabu nziza, Ni k’umunyabgenge azi guhanura amerera ugutwi kwumva.

¹³Nk’ukw imbeho ya shelegi[3] imera mu gihe c’iyimbura, Ni ko n’intumwa yizigirwa imerera abayitumye, Kukw ihēmbūra umutima wa ba shebuja.

¹⁴Nk’ukw ibicu n’umuyaga bitarimw’ imvura bimeze, Ni k’umuntu ameze yishemagiza ngw aratanga kand’ ar’ ukubesha.

¹⁵Gushishikara wiyoroheje vyemeza umucamanza, Kand’ ururimi rwiyoroheje rujanjagura igufa.

¹⁶Ni warenguka ku būki, urye ubukumaze akaruru, Woye kubguzuza inda, bukakudaha.

¹⁷Ikirenge cawe ntigihore mu nzu kwa mugenzawe, Kugira ngo ntahave akurambirwa, akakwanka.

¹⁸Umuntu yāgiriza mugenzi we ibinyoma Ni nk’ubuhiri n’inkota n’ umwampi ukarishe.

¹⁹Kwizigira umuntu w’igihemu mu gihe c’amagorwa, Ni nk’iryinyo ricitse, n’ukuguru gukōndōtse.

²⁰Kuvugiriza impundu umuntu atuntuye mu mutima Ni nk’umuntu kwiyambura impuzu mu gihe c’imbeho, n’inkarisha isutswe ku munyu witwa amagadi.

²¹Umwansi wawe ni yasonza umugaburire, Ni yagira inyota umuhe amazi yo kunywa:

²²Kuk’ uzoba umurunzekw amakara yaka ku mutwe, Kand’ Uhoraho azoguhēra.

²³Umuyaga uva i burārūko uzana imvura; Ni ko n’ururimi rurementanya ruzana kwiraburanirwa mu maso.

²⁴Wopfuma wībēra hanze,[4] Hak’ ubana n’umugore w’ ingāre mu nzu.

²⁵Nk’ukw amazi apfutse amerera umutima ufise icākāka, Ni ko n’inkuru nziza zimera, zivuye mu gihugu ca kure.

²⁶Umuntu agororotse agapfa kwemerana ivy’ umunyakibi Ameze nk’isōko itobetse, n’ imbizi y’iyōndoyōndo.

²⁷Si vyiza kurya ubūki bginshi cane: Kandi kwironderera icubahiro s’icubahiro.

²⁸Umuntu atītāngīra mu mutima Ameze nk’igisagara gitewe gisambutse uruzitiro.