Read Bibliya Yera 1951 Imigani 26 Bible Online

Imigani 26 - Bibliya Yera 1951 bible

Imigani 26

¹Nk’uko shelegi[5] itabereye mu gihe c’umumero, n’ imvura mu gihe c’iyimbura, Ni ko n’ukwubaha igipfu kutabereye.

²Nk’ukw akanyoni kayerēra, n’ intamba iguruka, Ni ko n’umuvumo w’ubusa ata we wokora.

³Ikimōko n’ic’ ifarasi, n’umujiginya n’uw’ indogoba, Inkoni na yo n’iy’ ibitugu vy’ ibipfu.

⁴Ntiwishure igipfu amagambo ahwanye n’ubupfu bgaco, Kugira ngo nawe ntibikwandukire.

⁵Wishure igipfu amagambo akwiranye n’ubupfu bgaco, Kugira ngo nticirate ko gifise ubgenge.

⁶Ūtumye igipfu Aba yīcīye ibirenge, yihamagariye ubuhombe.

⁷Amaguru y’ikimuga yama aregarega: Ni k’umugani umera mu kanwa k’ibipfu.

⁸Guha igipfu icubahiro Ni nko gushiburira akabuyenge k’igiciro kinini ku gihongo c’amabuye.

⁹Nk’ukw ihwa rihanda mu kiganza c’imborerwa, Ni k’umugani umera mu kanwa k’ibipfu.

¹⁰Umuhinga yikorera vyose ubgiwe, Arikw igipfu gipfa gucisha ingero uwihitira wese.

¹¹Nk’ukw imbga isubira ku vy’ idashwe, Ni kw igipfu gisubira ku bupfu bgaco.

¹²Ni wabona umuntu yirata kw afise ubgenge Umenye kw igipfu copfanirwa ikizigizigi kuruta uyo.

¹³Umunyabute aravuga, ati Mu nzira har’ intambge, Har’ intambge y’ubukombe mw ibarabara.

¹⁴Nk’uk’ urugi ruhindukira ku mapata yarwo, Ni k’umunebge ahindukira ku buriri bgiwe.

¹⁵Ikiremare kirokeza ukuboko mu nkōko, Bikagica inkokora kukugarukana ku munwa.

¹⁶Umunebge yirata kw afise ubgenge Buruta ubg’ abantu ndwi bazi kwishura ibiroranye.

¹⁷Uwihitira agashingwa n’intonganya z’ibitar’ ivyiwe Ameze nk’ūfata imbga ku matwi.

¹⁸Nk’uk’ umusazi ashwiragiza ibishirīra N’imyampi vyo kwica,

¹⁹Uko ni kw ameze, umuntu ahenda mugenzi we, Maz’ akavuga, at’ Erega najandajanda gusa!

²⁰Iy’ inkwi zibuze umuriro urazima, Kand’ ahatagira ūneguranira mu vyongorerano imitongano irashira.

²¹Nk’ukw amakara acana igitōngōrero, n’inkwi zicana umuriro, Ni k’umuntu w’amahane acana intonganya.

²²Amagambo y’ūneguranira mu vyongorerano ni nk’ivyo kurya biryoshe, Bimanuka bija epfo mu nda.

²³Iminwa ihemana n’umutima mubi Bimeze nk’ikibumbano gikuyengejekw ifeza.

²⁴Uwankana atuma iminwa yiwe ihendana, Kand’ abīka uburyarya imbere muri we.

²⁵Ni yagira imvugo nziza, ntuz’ umwemere, Kuko mu mutima wiwe harimw’ ibizira ndwi.

²⁶Nah’ inzigo yiwe yokwipfukapfukisha ubugunge, Ukugabitanya kwiwe kuzokwerekanirwa imbere y’ ishengero.

²⁷Uwimba icobo azokigwamwo, Kand’ ūtembagaza ikibuye kizomugarukako.

²⁸Ururimi rubesha rwanka abo rwakomerekeje, Kand’ akanwa gahemana kazana uguhona.