Read Bibliya Yera 1951 Imigani 27 Bible Online

Imigani 27 - Bibliya Yera 1951 bible

Imigani 27

¹Ntukarāte ivy’ ejo, Kuk’ utazi ivyo umusi uzovyara.

²Wopfuma ushimwa n’uwundi, hak’ ushimwa n’akanwa kawe; Wopfuma ushimwa n’akavantara, hak’ ushimwa n’ iminwa yawe.

³Ibuye rirarivye, umusenyi uraremereye, Arik’ umwikomo w’igipfu urusha vyompi uburemerezi.

⁴Uburake ni ruburakigongwe, ishavu ritwara nk’umuvo, Ariko ni nde yoshobora kwihanga ishari?

⁵Guhanira ahibonekeza Kuruta urukundo rudaseruka.

⁶Gukubitwa n’umukunzi biba bitewe n’ukuri, Arik’ ugusomagura kw’umwansi buba ar’ uburyarya.

⁷Umutima uhimvye winenaguza ikigigu c’ubūki, Arik’ umutima ushonje ibirura vyose birawuryohera.

⁸Nk’ukw inyoni itaye icāri iyerēra, N’umuntu ni kw ameze, iy’ ataye urugo rwiwe akayerēra.

⁹Ukw amavuta atāmirana n’ ibimota neza binezereza umutima, Ni ko n’uburyohe bg’umukunzi w’umuntu bumeze, buvuye mu nama zo mu mutima.

¹⁰Ntugahebe umukunzi wawe ubgawe, n’umukunzi wa so, Kandi ntuje kwa mwene wanyu ku musi uboneyekw amagorwa: Umubanyi wo hafi aruta mwene wanyu ari kure.

¹¹Mwana wanje, uce ubgenge, unezereze umutima wanje, Kugira ngo ngire ico nishura uwontuka.

¹²Umunyamakenga iy’ abonye ikibi kije, arikinga, Arikw imburabgenge zikomeza inzira zikīgabura.

¹³Twara impuzu y’uwishinze uwo atazi, Wake ingwati uwishinze umugore w’icigenze.

¹⁴Ūzinduka kare agahezagira mugenzi we n’ijwi rirenga, Abiharūrwako nko kumuvuma.

¹⁵Amatonyanga adahengeshanya yo ku musi w’imvura nyinshi, N’umugore atongana, vyompi ni kimwe.

¹⁶Kumutesha ni nko gutesha umuyaga, Kand’ ukuboko kwiwe kw’i buryo kuba gufashe umunyererwe.

¹⁷Ukw icuma gikarisha ikindi, Ni k’umuntu akarisha mugenzi we.

¹⁸Ūbungabunga umusukoni wiwe azorya insukoni zawo, Kand’ ūkorera shebuja neza azohabga icubahiro.

¹⁹Nk’ukw amaso arābana n’ ayandi mu mazi, Ni k’umutima w’umuntu urābana n’uwundi mu muntu.

²⁰I kuzimu n’amahonero nta ho bihāga, N’amaso y’abantu nta ho ahāga.

²¹Inkono yo mu ruganda iteka ifeza, n’umuriro uvugutira izahabu, Umuntu na we agezwa no gushimwa.

²²Igipfu naho wogisekurana n’ impeke mw isekuro, ugisekuje umuhini, Ubupfu bgaco ntibgokivako.

²³Gira umwete wo kumenya imikuku yawe ukw imeze, No kurāba cane amasho yawe,

²⁴Kukw itunga ridahoraho, Canke mbeg’ ingoma ihorah’ ibihe vyose?

²⁵Ubgatsi butemwe burakūrwaho, ubundi bukamera, Ivyatsi vyo ku misozi bikegeranywa.

²⁶Imyagazi y’intama izokwambika, Kand’ amasuguru azovamw’ ivyo kugura itongo;

²⁷Amata y’impene azoguhāzanya n’abo mu rugo rwawe, Kand’ azogutungira abigeme bagukorera.