Read Bibliya Yera 1951 Imigani 28 Bible Online

Imigani 28 - Bibliya Yera 1951 bible

Imigani 28

¹Abanyakibi bahunga ata wubirukanye, Arikw abagororotsi bagumya umutima nk’intambge.

²Iyo havyutse umugararizo mu gihugu abakiganza baba benshi, Arikw abantu b’ubgenge bakerebutse batuma impore ihoraho.

³Umuntu w’impabūke guhahaza abagorwa Ni nk’imvura y’isegenya idasigaza indya.

⁴Abataye ivyagezwe bashima abanyakibi, Arikw abitondera ivyagezwe barabarwanya.

⁵Abantu babi ntibatahura ibiroranye, Arikw abarondera Uhoraho batahura vyose.

⁶Umworo agendera mu bugororotsi bgiwe Aruta ikigoramange kijana inzira zibiri, nah’ ar’ umutunzi.

⁷Uwitondera ivyagezwe wese aba ar’umwana w’ubgenge, Arik’ umugenzi w’abakunzi b’ inda atētereza se.

⁸Ūgwirisha itunga ryiwe inyungu ivuye ku vyo yagurānye, akāka n’ibirenzeko, Aba abirundanirije ūgirira akagongwe abagorwa.

⁹Uwica ugutwi ngo ntiyumve ivyagezwe, N’ugusenga kwiwe na kwo kuba igisesema.

¹⁰Umuntu wese azimiza abagororotsi ngo bajane inzira mbi, Na we nyene azogwa mu rwobo rwiwe ubgiwe: Arikw abatunganye bazoragwa ivyiza.

¹¹Umutunzi yibarira kw afise ubgenge, Arik’ umworo ari n’umutima aramuhinyura.

¹²Abagororotsi iyo banesheje haba icubahiro cinshi, Arikw abanyakibi iyo bari hejuru abantu barinyegeza.

¹³Ūpfukapfuka ibigabitanyo vyiwe ntazoronka umugisha, Arik’ ūvyihana akabireka azogirirwa ikigongwe.

¹⁴Hahirwa umuntu yama yiyubara; Arik’ uwikomantaza umutima azogwa mu vyago.

¹⁵Ūtwaza ituntu abantu b’abafafara Ameze nk’intambge yivuga, n’igikōko citwa idubu yābagizwa n’inzara.

¹⁶Umuganwa w’imburabgenge akunda guhahaza cane, Arik’ uwanka inyungu mbi azoramba.

¹⁷Umuntu arikw amaraso y’ uwundi Azokwama ahunga arinde ashika i kuzimu; ntihaze hagire ūmubuza.

¹⁸Ūgenda atunganye azorokorwa, Arikw ikigoramange kijana inzira zibiri, kikagwa mur’ imwe.

¹⁹Ūrima itongo ryiwe azogira indya nyinshi, Arik’ ūkurikira ibitagira ikimazi azorya ubgoro bgiwe.

²⁰Umuntu w’umwizigirwa agira umugisha mwinshi, Arik’ uwihutira kuba umutunzi ntazobura guhanwa.

²¹Gutinya abantu ku kigohe si vyiza, Kandi si vyiza k’umuntu acumuzwa n’akamanyu k’ umutsima.

²²Uw’ ijisho ribi yihutira itunga, Kandi ntamenya yuk’ ubukene buzoteba bukamutera.

²³Ūhanūra umuntu, hanyuma azobona ishimwe Kuruta ūhemanisha ururimi.

²⁴Uwiba se canke nyina, akavuga ati Nta gicumuro, Uyo aba ari mugenzi w’ ūgeseza.

²⁵Uwigungirako vyose avyura imitongano, Arik’ uwizigira Uhoraho agira itōto.

²⁶Uwizigira uwiwe mutima aba ar’ igipfu, Arik’ ūgendana ubgenge azorokorwa.

²⁷Ūha umworo ntazokwigera akena, Arik’ ūmwirengagiza azogira imivumo myinshi.

²⁸Abanyakibi iyo bari hejuru abantu barinyegeza, Arikw iyo bahona abagororotsi baragwira.