Read Bibliya Yera 1951 Imigani 29 Bible Online

Imigani 29 - Bibliya Yera 1951 bible

Imigani 29

¹Ūhanūrwa kenshi akagamika izosi Azovunagurwa giturumbuka, atagira gitabara.

²Iy’ abagororotsi bagwiriye, abantu baranezerwa, Arikw iy’ umunyakibi aganza, abantu baraniha.

³Ūkunda ubgenge anezereza se, Arik’ uwifatanya na ba maraya yaya ivyiwe.

⁴Umwami akomeresha igihugu imanza ziroranye, Arik’ ūhongerwa aracūbika.

⁵Umuntu abgira mugenzi we amagambo y’agahemano Aba amuteze ururiba mu nzira.

⁶Igicumuro c’umunyakibi kimubera umutego, Arik’ umugororotsi araririmba akanezerwa.

⁷Umugororotsi ababara urubanza rw’abafafara, Arik’ umunyakibi ararwiyobagiza.

⁸Abacokoranyi badomeka igisagara umugararizo, Arikw abanyabgenge bahwamika uburake.

⁹Umunyabgenge iy’ahāririye n’ igipfu, Kiraraka kikītwengera, amahoro akabura.

¹⁰Abicanyi banka ūtunganye, Arikw abagororotsi barondera ingene bomukiza.

¹¹Igipfu gihogomboka ivy’ uburake bgaco bgose, Arik’ umunyabgenge we, iyo buje arabutsindagira, akabuhwamika.

¹²Ūganza, iyo yumvira ibinyoma Abasavyi biwe bose baba ar’ abanyavyaha.

¹³Umworo n’ūhahaza barahūra: Uhoraho ni we yahaye amaso ya bompi kubona.

¹⁴Ingoma y’umwami acira abafafara imanza z’ukuri Izokomezwa gushitsa ibihe bidashira.

¹⁵Inkoni n’indero nziza bicisha ubgenge, Arik’ umwana bapfa kurekera aho atētereza nyina.

¹⁶Abanyakibi iyo bagwiriye ibicumuro biragwira: Arikw abagororotsi bazokwitegereza uguhenebera kwabo.

¹⁷Hana umwana wawe, azokuruhura, Mber’ azonezereza umutima wawe.

¹⁸Iyo hatar’ uguhishurirwa, abantu bīgira uko bagomba, Arik’ uwitondera ivyagezwe aba ahiriwe.

¹⁹Icohasha umushumba s’amajambo masa: Kuko nah’ ayumva ntabibabara.

²⁰Ni wabona umuntu apfa kuvuga irisunitswe n’ impwemu, Umenye kw igipfu copfanirwa ikizigizigi kuruta uyo.

²¹Ūreze umushumba akamufyinisha uhereye mu buto bgiwe, Uburuhiro n’ukuzohava yīgira umwana wiwe.

²²Umuntu ashungumirwa avyura imitongano, Kand’ umuntu w’inkazi agira ibicumuro vyinshi.

²³Ubgibone bg’umuntu buzomusubiza hasi, Arik’ uw’ umutima uciye bugufi azoronka icubahiro.

²⁴Uwifatanya n’igisuma aba yanse ubugingo bgiwe, Iy’ abonye bamurahiza, yanka kumena ibanga.

²⁵Gutinya abantu n’ukwitega umutego, Arik’ uwizigira Uhoraho azoba amahoro.

²⁶Benshi barondera kwitonesha k’ūganza, Arik’ ukuroranirwa kw’umuntu kuva k’Uhoraho.

²⁷Ūdambikanya n’igisesema ku bagororotsi, Kand’ ūgenda atunganye n’ igisesema ku banyakibi.