Read Bibliya Yera 1951 Imigani 30 Bible Online

Imigani 30 - Bibliya Yera 1951 bible

Imigani 30

¹Amajambo ya Aguri mwene Yake, y’ivyo yavugishijwe. Umuntu yabariye Itiyeli, Itiyeli bo na Ukali,

²Ati N’ukuri nd’ ikiyingiyingi kurusha umuntu wese, Sinkerebutse nk’umuntu,

³Kandi sinize ubgenge, No kumenya Uwera singufise.

⁴Ni nde yadūze mw ijuru, akamanuka? Ni nde yakoranirije umuyaga mu bipfunsi vyiwe? Ni nde yatēkeye amazi mu mwambaro wiwe? Ni nde yashimangiye impera zose z’isi? Izina ryiwe ni nde, cank’ izina ry’umwana wiwe, namba worimenya?

⁵Ijambo ryose ry’Imana riravugutiwe: Ni yo nkinzo y’abayizigira.

⁶Ntukūngurire ku majambo yayo, Kugira ngo ntiz’ iguhane, ugahinyuka k’ur’ umubeshi.

⁷Ngusavye ibintu bibiri ntarahwera, Ntubinyime:

⁸Unshire kure y’ibitagira ikimazi, bo n’ibinyoma; Ntumpe ubgoro, ntumpe n’ ubutunzi; Ungaburire ivyo kurya dukwiranye:

⁹Sinze mpave mpimba nabi, nkakwihakana, nkavuga nt’ Uhoraho n’iki? Kandi noye kuba mworo, ngahava niba, Ngatukisha izina ry’Imana yanje.

¹⁰Ntukarementanirize umushumba kuri shebuja, Kugira ngo ntagende arakuvuma, maz’ ukaba wiyambitse ibara.

¹¹Har’ urunganwe rw’abantu batuka ba se, Ntibahezagire ba nyina.

¹²Har’ urunganwe rw’abantu bibgira ko batunganye, Ariko ntibuhagiwe imyanda yabo.

¹³Har’ urunganwe rw’abantu, emwe ingen’ amaso yabo bayashira hejuru! N’ibigohe vyabo bikagira ubgibone!

¹⁴Har’ urunganwe rw’abantu, amenyo yabo ni nk’inkota, n’ibijigo vyabo ni nk’imbugita, Ngo batsontsomere impahazwa bazimare mw isi, n’ aboro babamare mu bantu.

¹⁵Umuyoka ufise abakobga babiri, basemerera bati Mpa, mpa. Har’ ibintu bitatu bitīgera bihāga, Mbere ni bine ata ho bivuga, biti Geza aho,

¹⁶Ni vyo ibi: i kuzimu, bo n’ inda itavyara, Bo n’isi idahāga amazi, N’umuriro ata ho uvuga, uti Geza aho.

¹⁷Ijisho ry’ūcokora se, Kwumvira nyina akabikēngēra, Ibikōna vyo mu mwonga bizorinogora, Ibinyakabaka bizorirya.

¹⁸Har’ ibintu bitatu vy’igitangaza bindengeye, Mbere ni bine ntomenya,

¹⁹Ni vyo ibi: inzira y’inkukuma mu kirēre, N’inzira y’inzoka ku gitandara, N’inzira y’ubgato hagati mu kiyaga, N’inzira y’umusore ku mwigeme.

²⁰Uko ni kw inzira y’umusambanyikazi imeze: Ararya, akanyuza umunwa mw ivu, Akavuga, ati Nta kibi nakoze.

²¹Isi ihindishwa agashitsi n’ ibintu bitatu, Mbere ni bine, ivyo idashobora kwihanganira,

²²Ni vyo ibi: umushumba iy’ abaye umwami, N’igipfu iyo gihimvye ivyo kurya,

²³N’umukobga w’icanke iy’ arongowe, N’incoreke iyo yegukiye ivya inabuja.

²⁴Har’ ibintu bine bito‐bito kw isi, Ariko bifise ubgenge bginshi:

²⁵Ibimonyo n’ubgoko budafise inkomezi, Yamara vyiziganiriza indya zavyo zo mu ci;

²⁶Inkezi n’ubgoko bg’ubunyantege nke, Yamara zīronderera inzu zazo mu bitandara;

²⁷Inzige ntizigira umwami, Yamara zigenda zose zīciye imice;

²⁸Umuserebanyi ugendesha amaboko yawo, Yamar’ uba mu ngoro z’abami.

²⁹Har’ ibintu bitatu bigenda birashogamanga, Mbere ni bine bigenda birashonyashonya,

³⁰Ni vyo ibi: intambge, kukw ari yo irusha ibikōko vyose inkomezi, Kandi ntivira na kimwe mu nzira;

³¹N’ifarasi irikw amatandiko; n’impfizi y’impene; N’umwami, ari we rutarindwa.

³²Namba warakoze ivy’ ubupfu ukishira hejuru, Canke waragize ikibi wiyumvira, Ni wifate ku munwa.

³³Kuko gutērera amata kurēsa amavuta, No guhotora izuru kuzana amaraso, Ni ko kandi no kuvyura uburake kuzana imitongano.