Read Bibliya Yera 1951 Imigani 31 Bible Online

Imigani 31 - Bibliya Yera 1951 bible

Imigani 31

¹Amajambo y’umwami Lemuweli, ayo nyina yavugishijwe, akayamwigisha.

²Nguhanūre ngw iki ga mwana wanje? Nguhanūre ngw iki ga mwana w’ubura bganje? Nguhanūre ngw iki ga mwana w’amasezerano yanje?

³Ntukarekurire inkomezi zawe mu bagore, Cank’ umutima wawe mu bonona abami.

⁴Ntibibereye abami, Lemuweli we, ntibibereye abami kunywa vino, Cank’ abaganwa gushira umutima ku biboreza:

⁵Kuko bonywa bakibagira ivyagezwe, Bakadambikanya urubanza rw’umuntu wese w’umurushwa.

⁶Ikiboreza ugihe ūri hafi gupfa, Na vino uyihe ūfise akabonge mu mutima:

⁷Anywe yibagire ubgoro bgiwe, Ntaze yibuke ukundi imibabaro yiwe.

⁸Teranura akanwa uvugire ūtazi kuvuga, Būranira bose abatagira shinge na rugero.

⁹Teranura akanwa, uce izibereye, Ucire imanza impahazwa n’ umugorwa.

¹⁰Umugore aroranye ni nde yomuronka? Kukw ar’ uw’ igiciro kurusha utubuyenge twitwa marijani.

¹¹Umutima w’umugabo wiwe wama umwizigira, Kand’ i we ntihabura inyungu.

¹²Uyo mugore amugirira neza, ntamugirira nabi, Imisi yose y’ukubaho kwiwe.

¹³Arondera ubgoya bg’intama n’ipampa, Akoresha amaboko yiwe umutima ukunze.

¹⁴Ameze nk’amāto y’abadandaza, Ivyo kurya naho vyoba kure abikūrayo.

¹⁵Avyuka hakiri mw ijoro, Kand’ abo mu rugo rwabo akabagaburira, Akagerera abakobga biwe ibikorwa vyabo.

¹⁶Yitegereza indimiro akayigura, Atēza uruzabibu amaronko ava mu bikorwa vy’amaboko yiwe.

¹⁷Akenyera inkomezi, Agakomeza amaboko yiwe.

¹⁸Abona kw ibikorwa vyiwe bimugirira ikimazi, Kand’ itara ryiwe mw ijoro ntirizima.

¹⁹Afata ikijishisho, Iminwe yiwe igafata agati gahinga inyuzi.

²⁰Aha ikiganza umworo, Aramvurira amaboko umukene.

²¹Ntatinya ko shelegi[6] igwisha urukanya abo mu rugo rwabo, Kukw abo mu rugo bose bambaye izikomeye zisa n’ agahama.

²²Yijishira ivyo kuryamamwo, Yambara impuzu zera nziza n’iz’ amashigisha.

²³Umugabo wiwe n’umumenyekana mw ikombe ry’ igisagara, Iyo yicaye hagati mu bakuru b’igihugu.

²⁴Uyo mugore ajisha impuzu zera nziza akazigura, Bo n’imisipi, akayiha ūyimudandariza.

²⁵Inkomezi n’icubahiro ni vyo myambaro yiwe, Kand’ iyo yiyumviriye ivy’ igihe kizoza arītwengera.

²⁶Iy’ ateranuye akanwa avuga ivy’ ubgenge, Icagezwe c’ineza kiri ku rurimi rwiwe.

²⁷Agendeza ingeso z’abo mu rugo rwabo, Kandi ntarya ivyo kurya vy’ ukwamikara.

²⁸Abana biwe bava hasi bakamuhezagira, N’umugabo wiwe na we, akamushemagiza,

²⁹Ati Har’ abagore benshi bakora ivyiza, Ariko weho ubarusha bose.

³⁰Akazuru gusa karahendana, n’ubgiza bgo ku rukoba nta co bumaze, Arik’ umugore yubaha Uhoraho ni we ashimwa.

³¹Aragahabga ibiva mu maboko yiwe, Kand’ ibikorwa vyiwe ni bimushire hejuru aho bakoraniye mw ikombe ry’ igisagara.