Read Bibliya Yera 1951 Imigani 4 Bible Online

Imigani 4 - Bibliya Yera 1951 bible

Imigani 4

¹Yemwe bana, ni mwumve ukwigisha kwa so, Mushire imitima ku kumenya uburyo bgo gutahura:

²Kuko mbahaye inyigisho nziza; Ntimukave mw ibgirizwa ryanje.

³Kuko nanje nabereye data umwana nya mwana, Nabungabungwa ndi nk’ikinege mu maso ya mama.

⁴Kandi data yaranyigishije, arambarira, At’ Umutima wawe ugumye amajambo yanje; Witondere amabgirizwa yanje, ubone kubaho:

⁵Wironkere ubgenge, wironkere uburyo bgo gutahura; Ntukibagire, kandi ntugatere ibitugu amajambo y’akanwa kanje:

⁶Ubgenge ntukabute, na bgo buzokuzigama, Bukunde, buzokurinda.

⁷Ikir’ imbere ya vyose n’ubgenge: nuko wironkere ubgenge; Mber’ ivy’ ufise vyose ubihebere ugutahura.

⁸Bushire hejuru, na bgo buzogukuza: Buzoguhesha icubahiro ni wabugūmbīra.

⁹Buzokwambika umugāra w’ ubuntu mu mutwe, Buzoguha igitsibo c’ubgiza.

¹⁰Mwana wanje, ni wumve, wemere amajambo yanje, Ni ho imyaka y’ukubaho kwawe izoba myinshi.

¹¹Nakwigishije inzira y’ubgenge, Nakurōngōye mu nzira z’ ubugororotsi.

¹²Ni wagenda, ibirenge vyawe ntibizokwagirwa, Kandi ni wiruka ntuzotsitara.

¹³Gumya ukwigishwa, ntukurekure; Ukuzigame, kukw ari kwo bugingo bgawe.

¹⁴Ntukaje mu nzira y’abanyavyaha, Ntukagendere mu nzira y’ abanyakibi.

¹⁵Yizibukire, ntuyicemwo, Kevya, uyirengāne.

¹⁶Kuko badasinzira, shiti bakoze ikibi; Kandi n’itiro ryabo riraguruka, iyo batagize uwo bagwisha.

¹⁷Kuko barya umutsima uva mu bigabitanyo, Banywa vino iva mu muryano.

¹⁸Arikw inzira y’abagororotsi imeze nk’umuco wo mu gatondotondo, Ugenda urushiriza gukayangana gushitsa hakeye rwose.

¹⁹Inzira y’abanyavyaha imeze nk’umwiza, Ntibazi ico batsitarako ic’ ari co.

²⁰Mwana wanje, shira umutima ku majambo yanje, Tega ugutwi ukuvuga kwanje;

²¹Ntibikave imbere y’amaso yawe, Bizigamire imbere mu mutima wawe.

²²Kuko bibera ubugingo ababironka, No kunonoka mu mibiri yabo yose.

²³Rinda umutima wawe kurusha uko worinda ikindi cose, Kukw ari ho ubugingo bududubiriza.

²⁴Wīkūrekw akanwa kagoreka, N’iminwa ihushagirika uyishire kure yawe.

²⁵Amaso yawe atumbere imbere, N’ibigohe vyawe vyerekeze imbere yawe.

²⁶Usēne inzira y’ibirenge vyawe, Kand’ ingendo zawe zose zitungane.

²⁷Ntugatambamire i buryo cank’ i bumoso: Ukūre ikirenge cawe mu kibi.