Read Bibliya Yera 1951 Imigani 5 Bible Online

Imigani 5 - Bibliya Yera 1951 bible

Imigani 5

¹Mwana wanje, shira umutima ku bgenge bganje; Tega ugutwi uburyo bganje bgo gutahura.

²Kugira ng’ ugumye amakenga, N’iminwa yawe izigame ukumenya.

³Kukw iminwa y’umugore w’ icigenze itonyanga nk’ikigigu c’ubūki, Kand’ akanwa kiwe kanyerera kurusha amavuta ya elayo:

⁴Arikw iherezo ryiwe rirura nk’umururazi, Rikarishe nk’ubūgi bg’inkota.

⁵Ibirenge vyiwe bimanuka mu rupfu; Intambuko ziwe zimushikana i kuzimu;

⁶Bituma atabona inzira isēnnye y’ubugingo, Ingendo ziwe ziradandabagirana, kandi ntazi iy’ aja.

⁷None rero bana banje, munyumve, Ntimukave ku majambo y’ akanwa kanje.

⁸Uz’ umuce kure, Kandi ntiwēgēre umuryango w’inzu yiwe:

⁹Woye kwiha abandi, ngo bonone igikundiro cawe, Na ruburakigongwe ntumumarirekw imyaka yawe:

¹⁰Abanyamahanga boye guhāga ivyawe, Kand’ ivyakuruhije vyoye kuja mu nzu y’uwundi;

¹¹Nawe ukazoboroga kw iherezo ryawe, Ah’ umubiri wawe n’amagara yawe bizoba bishize,

¹²Ukavuga, ut’ Ewe ngo ndanka guhanūrwa, N’umutima wanje ugakēngēra guhanwa;

¹³Sinumvire ijwi ry’abigisha banje, Sintege ugutwi abāmpanūra!

¹⁴Nari nshigaje gatoya ngahetura ibibi vyose Hagati y’ishengero n’ikoraniro.

¹⁵Unywe amazi yo mw isōko yawe wiharije, N’amazi atemba yo mw iriba ryawe.

¹⁶Mbeg’ imigezi yawe yosābagira hose, N’inzuzi z’amazi zosābagira mu nzira?

¹⁷Ni bibe ivyawe ubgawe, Ntubisangire n’ivyigenze.

¹⁸Isōko yawe igire umugisha, Kand’ unezererwe umugore wo mu buto bgawe.

¹⁹Nk’impongokazi y’urukundo n’ingeregere y’igikundiro Amabere yiwe akubumbe ibihe vyose; Kandi wame uhimbarwa n’ urukundo rwiwe.

²⁰N’iki cotuma ga mwana wanje, uhimbarwa n’umugore w’icigenze, Ukagwa mu gikiriza c’ūtar’ uwawe?

²¹Kukw ingendo z’umuntu zir’ imbere y’inyonga z’Uhoraho, Kand’ asēna inzira ziwe zose.

²²Umunyavyaha, ukugabitanya kwiwe bgite ni kwo kuzomufata, Azodunuzwa n’ingoyi z’icaha ciwe.

²³Azopfa azize kudahaha, Kubg’ ubupfu bgiwe bukomeye azozimira.