Read Bibliya Yera 1951 Imigani 6 Bible Online

Imigani 6 - Bibliya Yera 1951 bible

Imigani 6

¹Mwana wanje, asangwa warabaye ishinga kuri mugenzawe, Cank’ ukarahira kw ari wewe umwishinze,

²Uba utezwe n’amagambo yo mu kanwa kawe, Uba ufashwe n’amagambo yo mu kanwa kawe.

³None rero, mwana wanje, kora urtya, wirokore, Kuk’ ushitse mu kuboko kwa mugenzawe; Bandanya, wicishe bugufi, wisabe mugenzawe ushishikaye.

⁴Amaso yawe ntuyahe itiro, N’ibigohe ntubihe guhūnyiza.

⁵Wirokore, nk’ukw ingeregere iva mu kuboko kw’umuhīgi, Kandi nk’ukw inyoni iva mu kuboko kw’umutezi.

⁶Genda ku kimonyo, wa munyabute; Witegereze ingeso zaco, uce ubgenge:

⁷Naho kitagira umucamanza, Cank’ umubgiriza cank’ ūganza,

⁸Ciziganiriza indya zaco zo mu ci, Kikēgeranya ivyo kurya vyaco mw iyimbura.

⁹Uzogeza ryari kwiryamira, ga wa munebge we? Uzovyuka ryari ng’ uve mw itiro?

¹⁰Ngo Hinge nce agatiro gakeya, mbe ndisinziriye gatoya, Nisegure ukuboko gatoya niboterere:

¹¹Uko ni k’ubgoro bgawe buzogushikako nk’umwambuzi, N’ikigoyi kizogushikako nk’ umuntu w’umurwanyi.

¹²Umuntu w’umugarariji, umuntu w’umugabitanyi, Agendana akanwa kagoreka;

¹³Avuniranira akagohe, akeburanisha ibirenge, Yāgana akāra;

¹⁴Ukugoreka kuri mu mutima wiwe, kandi yama yigenera ibibi; Avyura imitongano.

¹⁵Ni co gituma ukuranduka kuzomushikako giturumbuka; Azovunagurwa giturumbuka, atagira gitabara.

¹⁶Har’ ibintu bitandatu Uhoraho yanka, Mbere n’indwi bimusesema:

¹⁷Amaso y’ubgibone n’ururimi rw’ibinyoma, N’amaboko avisha amaraso y’ aberanda;

¹⁸N’umutima ugera imigabo mibi, N’ibirenge vyihutira kwirukira ikibi;

¹⁹N’icabona c’ibinyoma kivuga ivy’ ubuhūmvyi, N’ūvyura imitongano mu bavukana.

²⁰Mwana wanje, itondere icagezwe ca so, Kandi ntute ibgirizwa rya nyoko:

²¹Ubihambirire ku mutima wawe ibihe vyose, Ubipfundike mw izosi ryawe.

²²Bizokuja imbere ugenda, Bizoguteramira usinziriye, Bizoyāga nawe wikanguye.

²³Kukw icagezwe ar’ itara, kand’ amabgirizwa ar’ umuco; Kand’ uguhana kw’ukwigisha ar’inzira y’ubugingo:

²⁴Ngo bikurinde umugore w’ umunyakibi, N’uguhemana kw’ururimi rw’ umugore w’icigenze.

²⁵Ntukifuze ubgiza bgiwe mu mutima wawe, Kandi ntagufatishe kubongeka ingohe ziwe.

²⁶Kuko kubga maraya umuntu afūtāna gushitsa asigaye ku kamanyu k’agatsima: Kand’ umusambanyikazi ahīga ubugingo bg’igiciro.

²⁷Har’ umuntu yoshira umuriro mu gikiriza, Impuzu ziwe ntizishe?

²⁸Canke har’ uwogenda ku makara yaka, Ibirenge vyiwe ntibizigire?

²⁹Ni ko bimerera uwinjirana umugore wa mugenzi we; Ūmukorako wese ntazobura guhanwa.

³⁰Abantu ntibagaya umwivyi, iyo yibishwa No kumara akaruru kiwe ari n’inzara:

³¹Arikw iy’ afashwe ariha ibihetangabo ndwi; Azokwoza urugo rwiwe rwose.

³²Ūsambana n’umugore aba igipfamutima; Ūgira artyo aba arondera guhonnya ubugingo bgiwe.

³³Azoba yihamagariye inguma no gutītūka; Kand’ ibara azoba yiyambitse ntirizozimangana.

³⁴Kuko gufūha kw’umugabo kurandamura ishavu; Kandi ntazogira akagongwe ku musi wo kwihōra.

³⁵Ntazokwemera icīru na kimwe, Kandi ntazonyurwa naho womuhongera vyinshi.