Read Bibliya Yera 1951 Imigani 8 Bible Online

Imigani 8 - Bibliya Yera 1951 bible

Imigani 8

¹Mbega Bgenge ntahamagaye? N’ukumenya ntigushize hejuru ijwi ryakwo?

²Ku gatwe hejuru, i ruhande y’inzira, Mu mayirabiri, ni ho ahagaze.

³I ruhande y’amarembo, mw ishikiro ry’igisagara, Mu bikingi vy’amarembo, ni ho asemererera cane:

⁴Ati Ni mwebge mwa bagabo mpamagaye, Kand’ ijwi ryanje rihamagaye abana b’abantu.

⁵Yemwe mwa mburabgenge, mumenye kwiguranura ic’ ari co, Namwe bijuju, mugire imitima itahura.

⁶Mwumvirize, kuko ngira mvuge ibikomeye; Guteranura iminwa kwanje kuvamw’ ibibereye.

⁷Kukw akanwa kanje kagira kavuge ivy’ ukuri, Kand’ ikibi n’umuziro ku minwa yanje.

⁸Amajambo yose y’akanwa kanje n’ay’ ukugororoka, Kandi muri yo nta kigoramye cank’ ikigoretse.

⁹Yose arumvikana ku muntu atahura, Kand’ aratumbereye ku bāronse ubgenge.

¹⁰Mwākīre inyigisho zanje, si nk’ifeza, Mwākīre n’ukumenya kurusha izahabu z’indobanurwa.

¹¹Kuk’ ubgenge buruta utubuyenge twitwa marijani; Kandi mu bintu bihimbara vyose nta gihwanye na bgo.

¹²Jewe Bgenge, amakenga nayagize inzu yanje, Nserangura ukumenya n’inama nziza.

¹³Kwubaha Uhoraho ni kwo kwanka ikibi: Ubgibone n’amanyama n’inzira y’ikibi N’akanwa k’ibidadi, ndavyanka.

¹⁴Inama nziza n’iyanje, bo n’ ubgenge bushitse, Ni jewe kumenya, ndi n’inkomezi.

¹⁵Ni jewe mpa abami kuganza, N’abacamanza gushinga ibiroranye.

¹⁶Ni jewe mpa abaganza kuganza, N’abaganwa, eka mbere n’abacamanza bose bo mw isi.

¹⁷Nkunda abankunda, Kand’ abandondera ubudahumeka bazombona.

¹⁸Itunga n’icubahiro bir’ i wanje; N’ubutunzi buramba, bo n’ ubugororotsi.

¹⁹Imbuto namye zirusha izahabu ubgiza, mbere naho zoba izahabu zitarimw’ inkamba; N’ivyimburwa vyanje biruta ifeza z’indobānurwa.

²⁰Ngendera mu mayira y’ubugororotsi, No hagati mu nzira z’imanza ziroranye:

²¹Kugira ngw abankunda ndabahe kuragwa itunga, Kandi kugira ngo nuzuze ibigega vyabo.

²²Uhoraho yaranyamanye mw itanguriro ry’inzira ziwe, Ataratangura na kimwe mu bikorwa vyiwe vya kera.

²³Nashizweh’ uhereye kera hose, uhereye mbere na mbere, Isi itararemwa.

²⁴I bgina hatarabaho nari naravutse; Amasōko yuzuye amazi atarabaho.

²⁵Imisozi miremire itarashirwaho, Bo n’udusozi, nari naravutse:

²⁶Itararema isi cank’ indimiro, Cank’ itanguriro ry’umukungugu wo kw isi.

²⁷Igihe yashirah’ ijuru ni ho nari ndi: N’igihe yarihetera hejuru y’i bgina;

²⁸Ijuru igihe yarigumya hejuru iyo, Igihe amasōko y’i bgina yakomera;

²⁹Igihe yashingira ikiyaga akarimbi, Kugira ngw amazi ntarenge icagezwe cayo; Igihe yashirah’ amatanguriro y’isi:

³⁰Ico gihe nari kumwe na yo, nd’ umukozi w’umuhanga: Kand’ imisi yose narayihimbara, Nama niginagura imbere yayo;

³¹Niginagura mw isi yayo yāgānutse; Mpimbarwa n’abana b’abantu.

³²None rero, bana banje, ni munyumve: Kukw abitondera inzira zanje ar’ abahirwe.

³³Mwumvirize inyigisho, muce ubgenge, Kandi ntimuze muzanke.

³⁴Hahirwa umuntu anyumviriza, Akāma arerekeye ku myugariro yanje uko bukeye, Agategera ku bishimaryango vyanje.

³⁵Kuk’ ūmbona wese aba abonye ubugingo, Kand’ akazotoneshwa n’Uhoraho.

³⁶Arik’ ūncumuyeko, aba yankirije ubugingo bgiwe nyene: Abanyanka bose bakunda urupfu.