Read Bibliya Yera 1951 Umusiguzi 5 Bible Online

Umusiguzi 5 - Bibliya Yera 1951 bible

Umusiguzi 5

¹Urinde ikirenge cawe iy’ uja mu ngoro y’Imana; kuko kwēgēra ngo wumve kuruta gutanga ibimazi kw’ibipfu, kuko batazi ko bakora ibizira.

²Akanwa kawe ntikagire ico gatuntumukana, kand’ umutima wawe woye gushushudikanya kw ijambo na rimwe imbere y’Imana; kukw Imana iri mw ijuru, nawe ukaba kw isi: nuko rer’ amajambo yawe abe make.

³Kukw inzozi ziterwa n’ibikorwa vyinshi, kand’ ijwi ry’igipfu rimenyekanira ku magambo menshi.

⁴Ni wasezerana isezerano ku Mana, ntutebe kurishitsa; kukw idahimbarwa n’ibipfu: ushitse ico wasezeranye.

⁵Wopfuma utagira ico usezerana, hak’ usezerana ntushitse.

⁶Ntukundire akanwa kawe gucumuza umubiri wawe; kandi ntuz’ uvugire imbere y’umumarayika yuko kwabaye ugucorokwa: non’ Imana irinde kurakishwa n’ijwi ryawe ku ki, no gusangangura igikorwa c’amaboko yawe?

⁷Kuko mu nzozi nyinshi harimw’ ubusa, no mu magambo menshi n’uko: ariko weho, wubahe Imana.

⁸Ni wabona umworo ahahazwa, kand’ urubanza n’ibiroranye vyicwa ku manyama mu gihugu, ntibize bigutangaze: kukw Iyirusha abakuru ubukuru ivyitegereza, kandi har’ ubukuru bubarengeye.

⁹Ikigirira ikimazi igihugu muri vyose, n’umwami kwubahwa mu gihugu.

¹⁰Inkunzi y’amahera ntizohāzwa n’amahera; bo n’ūkunda ibitayega ntazohāzwa n’inyungu: ivyo na vyo nyene n’ubusa.

¹¹Iy’ ibintu bigwiriye ababirya baragwira: kandi nyenevyo bimumarira iki, atar’ ugupfa kubirābisha amaso?

¹²Agatiro k’umunyabikorwa kararyoha, n’iy’ ariye bike canke vyinshi: ariko gufunereza kw’umutunzi kumubuza gusinzira.

¹³Har’ ikibi gikomeye nabonye musi y’izuba, n’umuntu gutunga itunga rikazomwica:

¹⁴maz’ iryo tunga rikazotikizwa n’ikibi kirikorokeye; kand’ asanzwe yaravyaye, umwana wiwe azoba asigaye ata co afise mu ntoke.

¹⁵Nk’uko yavuye mu nda ya nyina ari gusa, azogenda artyo nk’uko yaje, adatwaye ikintu na kimwe kivuye mu butame bgiwe yojana mu ntoke.

¹⁶Kand’ iki na co n’ikibi gikomeye, yuk’ uko yaje kwose ari kw azogenda: non’ afise inyungu ki mu buruhe yaruhiye umuyaga?

¹⁷Imisi yiwe yose arīra mu mwiza, kand’ akagira umubabaro, akagira indwara n’umwikomo.

¹⁸Eh’ ico nabonye kibereye kandi c’igikundiro: n’umuntu kurya akanywa, akanezererwa ivyiza bivuye mu butame bgiwe bgose, ubg’ atamira musi y’izuba, imisi yose y’ukubaho kwiwe, iyo Imana yamuhaye: kukw ivyo ari vyo mugabane wiwe.

¹⁹Kand’ umuntu wese Imana yahaye ubutunzi n’ibintu, ikamuha ubushobozi bgo kubirya, no gukūramw’ umugabane wiwe, no kunezererwa ibivuye mu butame bgiwe: ivyo na vyo n’ingabire y’Imana.

²⁰Kukw atazokwibuka cane imisi y’ukubaho kwiwe, kukw Imana imuhaye umunezero mu mutima wiwe.