Read Bibliya Yera 1951 Umusiguzi 7 Bible Online

Umusiguzi 7 - Bibliya Yera 1951 bible

Umusiguzi 7

¹Ukuvugwa neza kuruta amavuta atāmirana y’igiciro kinini, kand’ umusi wo gupfa uruta uwo kuvukako.

²Ni vyiza kuja mu nzu y’abagandaye kuruta kuja mu nzu y’intumire: kukw ari ryo herezo ry’abantu bose, kand’ ūkiriho abishirak’ umutima.

³Umubabaro uruta agatwengo: kuko naho mu maso hoba hijiriwe, umutima womera neza.

⁴Umutima w’abanyabgenge uri mu nzu y’abagandaye, arik’ umutima w’ibipfu uri mu nzu y’ibikino.

⁵Iciza n’ ukwumvira igihano c’umunyabgenge kuruta kwumviriza imvyino z’ibipfu.

⁶Nk’uko guturagurika kw’amahwa kumeze musi y’inkono, ni ko gutwenga kw’igipfu kumeze; ivyo na vyo nyene n’ubusa.

⁷N’ukuri kugunga guhindura umunyabgenge igipfu, kand’ impēra izimiza ubgenge.

⁸Iherezo ry’ikintu riruta itanguriro ryaco; kand’ uw’ umutima wihangana aruta uw’ umutima w’ubgibone.

⁹Ntukihutire kuraka mu mutima: kuk’ uburake bgama mu mushaha w’ibipfu.

¹⁰Ntukavuge, uti Ni ku ki imisi ya kera iruta iy’ ubu? Kuko mur’ ivyo utaba ubajije ivy’ ubgenge.

¹¹Ubgenge bungana n’umwandu mu kuba bgiza: mbere burushiriza kubera bgiza ababona izuba.

¹²Kuk’ ubgenge ar’ ubgugamo, nk’ukw amahera ar’ ubgugamo; arikw inyungu iva mu kumenya n’iyi: n’uk’ ubgenge buzigama ubugingo bga nyenebgo.

¹³Itegereze igikorwa c’Imana: none ni nde yoshobora kugorora ico yagoramitse?

¹⁴Ku musi w’amahoro unezerwe; ku musi w’ amarushwa wiyumvire: Imana yarabibangikanije, kugira ng’ umuntu ntaz’ aserangure ikintu na kimwe kizoba hanyuma yiwe.

¹⁵Ivyo vyose narabibonye mu misi yanje yapfuye ubusa: har’ aho umugororotsi akenyuka kand’ agororotse, kandi har’ aho umunyakibi aramba kand’ akora ibibi.

¹⁶Ntube umugororotsi arengeje urugero, kandi ntiwīgire umunyabgenge burengeranye: n’iki cotuma wikwegera kuranduka?

¹⁷Ntube n’umunyavyaha arengeje urugero, kandi ntube igipfu: n’iki cotuma ukenyuka igihe cawe kitarashika?

¹⁸Ivyiza n’uko bimwe ubifata, ibindi na vyo ntubikūrek’ ukuboko: kuk’ uwubaha Imana azokwikiza mur’ ivyo vyose.

¹⁹Ubgenge bubera umunyabgenge ububasha kuruta abatware cumi bari mu gisagara.

²⁰N’ukuri nta mugororotsi ariho kw isi akora ivyiza ntacumure.

²¹Kand’ ikindi, ntushire umutima ku majambo yose avugwa, ntuhave wumva umushumba wawe agutuka:

²²kuko kenshi na kenshi uzi mu mutima wawe nawe nyene ko watutse abandi.

²³Ivyo vyose nabigerageje mu bgenge; naravuze, nti Nzoba umunyabgenge; ariko bgambaye kure.

²⁴Ibiri kure, bikaba i bgina iyo bihera, ni nde yoshobora kubishikīra?

²⁵Maze nshira umutima wanje ku kumenya no gusesa no guserangura ubgenge n’ inyanduruko z’ibintu, no kumenya kw icaha ar’ ubupfu, kandi k’ubupfu ar’ ibisazi.

²⁶Nsanga ikintu kirusha urupfu kurura: n’umugore umutima wiwe ar’ imitego n’ururiba, amaboko yiwe akaba imvuto: umuntu wese ahimbara Imana azomukira, arik’ umunyavyaha azofatwa na we.

²⁷Ehe ngiki ico nabonye, ni k’Umusiguzi agize, mmaze kugereranya kimwe n’ikindi ngo mmenye inyanduruko zavyo;

²⁸ico umutima wanje ukirondera, sindakibona: nabonye umugabo umwe mu bantu igihumbi, ariko nta mugore nabonye mur’ abo bose.

²⁹Eh’ ico nabonye n’iki kimwe gusa, n’ukw Imana yaremye abantu bagororotse; ariko bo birondereye ivyo bigeneye vyinshi.