Read Bibliya Yera 1951 Indirimbo ya Salomo 1 Bible Online

Indirimbo ya Salomo 1 - Bibliya Yera 1951 bible

Indirimbo ya Salomo 1

¹Indirimbo y’agaheta, ya Salomo.

²N’unsomeshe ugusomana kw’ akanwa kawe: Kuk’ urukundo rwawe ari rwiza kurusha vino.

³Amavuta yawe aratāmirana cane, Izina ryawe rimeze nk’amavuta asutswe; Ni co gituma inkumi zigukunda.

⁴Mfata nkuje inyuma, twiruke. Umwami yanshikanye i kare: Tuzonezerwa, nawe uzoduhimbara. Tuzokwamamaza urukundo rwawe kurusha uko twokwamamaza vino: Urukundo bagukunda rurakubereye.

⁵Ndirabura, ariko ndi mwiza, Mwa bakobga b’i Yerusalemu; Mmeze nk’amahema y’i Kedari, Nk’imikingo ya Salomo.

⁶Ntimumpange amaso, kuko nirabura, Kukw izuba ari ryo ryanyirabuje. Abahungu ba mama bārandakiye, Banzigamishije imirima y’imizabibu, Arik’ urwanje ruzabibu sinaruzigamye.

⁷Yewe, uwo umutima wanje ukunda, umbarire Ah’ uragira ah’ ari ho, N’ah’ uvyagiza mu mahodoka: None n’iki cotuma ngenda nk’uwitwikiriye mu maso, Nca i ruhande y’imikuku ya bagenzi bawe?

⁸Asangw’ utahazi, yewe urusha abandi bagore akaranga, Jana inzira y’ibitungwa, Uragire imyagazi y’impene yawe i ruhande y’insago z’abungere.

⁹Ewe mukunzi wanje, nakugereranije N’ifarasi yo mu zikwega imikogote ya Farawo.

¹⁰Imisaya yawe itewe gushaza n’ibitsibo vy’umushatsi wawe, N’izosi ryawe rishazishijwe n’utugenegene tw’igiciro kinini.

¹¹Tuzogutsibira ibitsibo vy’izahabu, Birimw’ intabonwa z’ifeza.

¹²Umwami akivyagiye, ari ku meza yiwe, Amavuta yanje yatanguye gutāmirana.

¹³Umukunzi wanje ammereye nk’itu ry’isenga Riri hagati y’amabere yanje.

¹⁴Umukunzi wanje ammereye nk’agati kitwa koferu gashuritse udushurwe tw’uturundo Kaba mu nzabibu zo muri Eni‐gedi.

¹⁵Ereg’ uri mwiza, mukunzi wanje, n’ukuri uri mwiza pe; Amaso yawe asa n’inuma.

¹⁶Ereg’ uri mwiza, mukunzi wanje, mber’ urahimbaye; Ikirwa cacu kigaranzuyek’ ubusaswa busha.

¹⁷Imitambikwa y’ingoro yacu n’ibiti vy’amasederi, Ibishoro vyayo n’imiberoshi.