Read Bibliya Yera 1951 Indirimbo ya Salomo 2 Bible Online

Indirimbo ya Salomo 2 - Bibliya Yera 1951 bible

Indirimbo ya Salomo 2

¹Nd’ ishurwe rya habaseleti ry’i Sharoni, Ikirungu co mu biyaya.

²Nk’ikirungu mu mahwa Ni k’umukunzi wanje ameze mu bandi bakobga.

³Nk’igiti c’icungwa mu bindi biti vyo mw ishamba Ni k’umukunzi wanje ameze mu bandi basore. Mpimbarwa no kwicara mu gitūtu ciwe, Amacungwa yiwe aransosera.

⁴Yanjanye mu nzu y’amazimano, Ibendera yiwe yari hejuru yanje yar’ iy’ urukundo.

⁵Ni mumpēmbūze udutore tw’ inzabibu, mundabūze amacungwa, Kuk’ urukundo runshābije.

⁶Ukuboko kwiwe kw’ukubamfu kuranseguye, Ukuboko kwiwe kw’ukuryo kurampfumbatiye.

⁷Ndabihanikirije, mwa bakobga b’i Yerusalemu mwe, Nk’uko bagenza ku ngeregere no ku mpongokazi vyo mw ishamba, Ntimunkomere umukunzi, ntimumukangure, Gushitsa ah’ avyigombeye.

⁸Ijwi ry’umukunzi wanje! Eh’ araje, Yikina amatavu ku misozi, Akinagira ku turambi.

⁹Umukunzi wanje ameze nk’ ingeregere canke nk’umukangara w’impongo: Eh’ ahagaze inyuma y’inzu yacu, Arungurukira mu madirisha, Yiyerekanira mu nshingo zayo.

¹⁰Umukunzi wanje aravuga, arambariye, Ati Va hasi, mukunzi wanje, mwiza wanje, ngwino tugende:

¹¹Kuko rāba, urushana rurashize, Imvura iragiye, iracitse;

¹²Amashurwe aratanguye gushurika ku misozi, Igihe co kujwiragira kw’ inyoni kirashitse, Ijwi ry’intunguru rirumvikanye mu gihugu cacu;

¹³Insukoni z’ibitumbge ziratanguye guhishira ku musukoni wazo, Imizabibu irashuritse, Imota ubumote bgayo bgiza. Va hasi, mukunzi wanje, mwiza wanje, ngwino tugende.

¹⁴Ewe inanuma wanje, uba mu gihoro co mu gitandara no mw isenga ryo ku gatembge, Reka ndābe mu maso hawe, numve n’ijwi ryawe; Kukw ijwi ryawe ari ryiza, n’uburanga bgawe bukaba buhebuje.

¹⁵Ni mudufatire imbgebge, twa tubgebge duto‐duto twonona imirima y’imizabibu, Kukw imizabibu yacu ishuritse.

¹⁶Umukunzi wanje n’uwanje nanje nd’uwiwe, Aragira mu birungu.

¹⁷Garuka, mukunzi wanje, umere nk’ingeregere canke nk’umukangara w’impongo Wo ku misozi y’i Beteri, Igihe ca ni musi kitarashika, ibitūtu vyo ku kirengazuba bitarazimangana.