Read Bibliya Yera 1951 Indirimbo ya Salomo 3 Bible Online

Indirimbo ya Salomo 3 - Bibliya Yera 1951 bible

Indirimbo ya Salomo 3

¹Mw ijoro ndi ku buriri narondeye umugabo umutima wanje ukunda: Ndamurondera, ndamubura.

²Ndavuga, nti Hinge mvyuke, ngendagende mu gisagara, Mu nzira no mu hiyaguye haho, Ndondere uwo umutima wanje ukunda: Naramurondeye, ndamubura.

³Duhūra n’abashibamyi bagendura igisagara: Ndababaza, nti Mbega mwabonye wa wundi umutima wanje ukunda?

⁴Mmaze kubarēngāna gato Mbona uwo umutima wanje ukunda; Ndamufata, nanka kumurekura, Kugeza aho namushikanye mu nzu ya mama, Mu nzu y’uwamvyaye.

⁵Ndabihanikirije, mwa bakobga b’i Yerusalemu mwe, Nk’uko bagenza ku ngeregere no ku mpongokazi vyo mw ishamba, Ntimunkomere umukunzi, ntimumukangure, Gushitsa ah’ avyigombeye.

⁶Uriya ni nde, adūga avuye mu bugaragwa Ameze nk’umwotsi upfunduka nk’inkingi, Atāmirana isenga n’imibavu, N’ibimota neza vyose vy’ ibidandazwa?

⁷Erega n’inderuzo ya Salomo: Har’ abahizi mirongwitandatu bayikikije, Bo mu bahizi b’Abisirayeli.

⁸Bose bitwaza inkota, kandi n’abahinga bo kurwana: Umuntu wese yambaye inkota kw itako ryiwe, Kubg’ ibiteye ubgoba vyo mw ijoro.

⁹Umwami Salomo yībāzishirije inderuzo y’intebe, Mu biti vy’i Lebanoni.

¹⁰Inkingi z’icugamo yazicurishije mw ifeza, N’icegamo mw izahabu. Icicaro cayo cakoreshejwe impuzu y’agahama, Imbere hashashwe insobane Yajishanywe urukundo n’abakobga b’i Yerusalemu.

¹¹Yemwe bakobga b’i Siyoni, ni musohoke murābe umwami Salomo, Afise igitsibo yambitswe na nyina ku musi w’ubukwe bgiwe, Ni wo musi w’umunezero w’umutima wiwe.