Read Bibliya Yera 1951 Indirimbo ya Salomo 4 Bible Online

Indirimbo ya Salomo 4 - Bibliya Yera 1951 bible

Indirimbo ya Salomo 4

¹Ereg’ uri mwiza, mukunzi wanje, n’ukuri uri mwiza pe; Amaso yawe acishirije mu mwitwikiro wawe asa n’ inuma: Umushatsi wawe umeze nk’ umukuku w’impene Zivyagiye ku nkēngēra y’umusozi w’i Gileyadi.

²Amenyo yawe n’akāmenge nk’umukuku w’intama zākemuwe, Zivuye kwuhagirwa, Zifise amahasa zose, Ata n’imwe muri zo yagumbashe.

³Iminwa yawe imeze nk’urunyuzi rusa n’agahama, Kand’ akanwa kawe ni keza. Mu misaya yawe hameze nk’igisate c’ikomamanga, Iboneka mu mwitwikiro wawe.

⁴Izosi ryawe rimeze nk’umunara wa Dawidi Wubakiwe kubīkwamw’ ibirwanishwa, Umanitsemw’ inkinzo igihumbi, Inkinzo zose z’abahizi.

⁵Amabere yawe yompi ameze nk’ivyagazi bibiri vy’amahasa y’ingeregere Birīsha mu birungu.

⁶Hinge nīgīre ku musozi ubakw isenga, No ku gasozi kabakw imibavu, Igihe ca ni musi kitarashika, ibitūtu vyo ku kirengazuba bitarazimangana.

⁷Uri mwiza bihebuje ga mukunzi wanje; Nta gasembga ufise.

⁸Ngwino tuvane i Lebanoni, mugeni wanje, Tuvane i Lebanoni. Manuka uve ku mpinga y’ ahitwa Amana, Uve ku mpinga z’i Seniri n’i Herumoni, Uve ku masenga y’intambge, Uve ku misozi ibamw’ ingwe.

⁹Uhimbaje umutima wanje, mushikanje, mugeni wanje: Uhimbarishije umutima wanje ijisho ryawe, N’umugufu umwe wo mw izosi ryawe.

¹⁰Ewe kuntu urukundo rwawe ari rwiza, mushikanje, mugeni wanje! Urukundo rwawe ukuntu rundutira vino! Gutāmirana kw’amavuta yawe ukuntu kundutira imibavu y’ubgoko bgose!

¹¹Iminwa yawe, mugeni wanje, itonyanga umutsāma: Ubūki n’amata biri musi y’ururimi rwawe; Gutāmirana kw’impuzu zawe kumeze nk’ugutāmirana kw’i Lebanoni.

¹²Ur’ umurima uzitiriwe, mushikanje, mugeni wanje, Ur’ isōko yīmiriwe, iriba rishizwekw ikimenyetso co kuriziririza.

¹³Iminago yo kuri wewe n’umurima w’amakomamanga, wama ivyiza; Urimwo koferu n’uduti twa narada,

¹⁴Narada na karukoma, Imisigati na mudarasini, n’ibiti vyose vy’imibavu, Isenga n’imbazi n’amoko yose y’ibisosa biruta ibindi.

¹⁵Ur’ iriba ryo mu mirima, Ur’isōko y’amazi yiburuka, N’imigezi itemba iva i Lebanoni.

¹⁶Kanguka, wa muyaga uva i burārūko, nawe uw’ i bumanuko, n’uze; Muhūhe ku murima wanje, kugira ng’ ubutāmirane bgaho bukwire hose. Umukunzi wanje n’aze mu murima wiwe, Arye ivyiza vyiwe vyamye muri wo.