Read Bibliya Yera 1951 Indirimbo ya Salomo 8 Bible Online

Indirimbo ya Salomo 8 - Bibliya Yera 1951 bible

Indirimbo ya Salomo 8

¹Iyaba wari nka musazanje, Yonse amabere ya mama! Ngusanze hanze nokugumbiriye: Ego me, nta n’uwongaya.

²Nokujana, nkagushikana mu nzu ya mama, Mu nzu y’uwamvyaye. Nogusomya kuri vino ituriranije, No ku mazi y’amakomamanga yanje.

³Ukuboko kwawe kw’ukubamfu kwonsegura, Ukuboko kwawe kw’ukuryo kwompfumbatira.

⁴Ndabihanikirije, mwa bakobga b’i Yerusalemu mwe, Ntimunkomere umukunzi, ntimumukangure, Gushitsa ah’ avyigombeye.

⁵Mbeg’ uriya mugeni ni nde, adūga avuye mu bugaragwa, Yegamiye umukunzi wiwe? Nagukanguye musi y’igiti c’umucungwa; Aho ni ho nyoko ibise vyamufatiye akuvyara, Ni ho uwakuvyaye yafatiwe n’ibise.

⁶Nshira ku mutima wawe nk’ ikimenyetso, mbe nk’ikimenyetso ku kuboko kwawe: Kuk’ urukundo rufise inkomezi nk’urupfu, Ifuhe rinyinyaraye nk’i kuzimu; Ibirimi vyavyo ni nk’ibirimi vy’umuriro, N’urubeya rw’inkazi rw’ Uhoraho.

⁷Amazi n’iyo yoba menshi ntiyozimya urukundo, N’inzūzi zuzuye ntizorurenga hejuru. Umuntu yotanga ivy’ afise vyose mu rugo rwiwe, ngw aje kugura urukundo, Yogawa rwose!

⁸Dufise murumuna wacu mutoya, Atarasonga amabere. None tuzogira dute murumuna wacu Igihe azosabirwa?

⁹Namb’ ameze nk’uruzitiro rw’amabuye Tuzomwubakak’ umutara w’ ifeza. Namb’ ameze nk’umuryango Tuzomukingishiriza imbaho z’amasederi.

¹⁰Jeho nd’ uruzitiro rw’amabuye, kand’ amabere yanje ni yo minara yarwo: Mu maso y’umugabo wanje mmeze nk’ūronse amahoro.

¹¹Salomo yar’ afise uruzabibu i Bayali‐Hamoni; Yarusigaranye abarimyi; Umuntu wese muri bo yagerewe gutanga amahera y’ifeza igihumbi ku nzabibu zarwo.

¹²Urwanje ruzabibu rwo, rur’ imbere yanje: Yewe Salomo, uzohabga ca gihumbi cawe, Kand’ ababungabunga inzabibu zarwo na bo bazohabga amajana abiri.

¹³Yewe uba mu mirima, Abagenzi bateze amatwi ijwi ryawe: N’urinyumvishe nanje.

¹⁴N’unyaruke, mukunzi wanje, Umere nk’ingeregere canke nk’umukangara w’impongo, Wo ku misozi ibakw imibavu.