Read Bibliya Yera 1951 Yesaya 16 Bible Online

Yesaya 16 - Bibliya Yera 1951 bible

Yesaya 16

¹Abaganza igihugu, ni murungike ingorore z’imyagazi y’intama muzikūye i Sela, muzicishe mu bugaragwa, muzirungike ku musozi w’umukobga w’i Siyoni.

²Kuko nk’ukw inyoni ziyerēra icāri gisambutse, ni kw abakobga b’i Mowabu bazomera ku vyambu vya Arunoni.

³Tugīre inama, uduhanure, ku murango w’amaminangohe utubere igitūtu kimeze nk’ijoro: uhishe abirukanywe, kandi n’inyererezi ntuz’ uzigonyorere.

⁴Abirukanywe banje ubemere babe i wawe: kand’ ab’ i Mowabu ubabere ubuhungiro ku babanyaga. Umunyagahahazo ni yahindurwa ubusa, ukunyaga kugashira, kand’ abasiribanga abantu bagaherengetera mu gihugu,

⁵ni ho intebe y’ubgami izoshimangirwa n’imbabazi, kandi hazobah’ ūzoyivyagirako mu kuri, mu nzu ya Dawidi, ar’ umucamanza ashishikara izibereye, akabanguka gukora ivy’ ukugororoka.

⁶Twumvise ubgībone bg’i Mowabu, ko hībona cane: twumvise n’ukwishira hejuru kwaho n’ubgībone bgaho n’agakēngērwe kaho: arik’ ukwīrārīra kwaho n’ukw’ ubusa.

⁷Ivyo ni vyo bizotuma Abanyamowabu baborogera Mowabu, umuntu wese azoboroga: muzorizwa n’amarobe y’inzabibu y’i Kiri‐hareseti mwihebuye rwose.

⁸Kukw imirima y’i Heshiboni iravye, bo n’uruzabibu rw’i Sibuma; abami b’amahanga bāvunaguye amashami yarwo meza‐meza: yar’ ashitse n’i Yazeri, agakakariza mu bugaragwa; amashami yarwo yaragasaye ajabuka n’ikiyaga.

⁹Kubg’ ivyo nzoririra uruzabibu rw’i Sibuma, nk’ukw ab’ i Yezeri baruririra. Nzogutotesha amosozi yanje, yewe Heshiboni, nawe Eleyale: kukw akarūru k’intambara kavugiye ku vyeze vyawe vyo mu ci no ku vyimburwa vyawe.

¹⁰Akanyamuneza n’ibihimbaro bīkūwe mw itongo rimera cane; nta kuririmba kuzoba mu ruzabibu, cank’ ijwi ry’umunezero; nta mukānyi azokānyira vino mu bgato: akayego k’abakānyi ndakajibije.

¹¹Umutima wanje ucurira intimba Mowabu nk’inanga, no mu nda yanje har’ intimba y’i Kiri‐heresi.

¹²Kand’ Abanyamowabu ni barasuka, bakaja kwigorera mu bitabo, bakaja mu bigabiro ngo basenge, nta co bizobamarira.

¹³Iryo jambo ni ryo Uhoraho yari yaravuze kuri Mowabu mu bihe vyashize.

¹⁴Ariko noneho, Uhoraho avuze, ngw Imyaka itatu itarashira, urīmbūye imyaka nk’iy’ umucangero, icubahiro c’i Mowabu kizokēngērwa bo n’ishengero ryaho ryose rikomeye, kand’ amasigarira azoba ar’ inkehwa rwose, ata co bamaze.