Read Bibliya Yera 1951 Yesaya 19 Bible Online

Yesaya 19 - Bibliya Yera 1951 bible

Yesaya 19

¹Imbūri yo kuri Egiputa. Rāba Uhoraho areruwe n’ igicu cihuta, aja muri Egiputa; ibigirwamana vyo muri Egiputa bizohindira agashitsi imbere yiwe, umutima wa Egiputa uzoyagira mu nda.

²Nzoteranya Abanyegiputa bisubiraniremwo: umuntu wese azorwana n’uwo bavukana, umuntu wese arwane n’umubanyi wiwe, igisagara kirwane n’ikindi, ubgami burwane n’ubundi.

³Umutima wa Egiputa uzokamangana, nanje nzokwica imigabo yaho; bazoja gusiguza ibigirwamana n’abavovota n’abahamagara imizimu bo n’abamenyi.

⁴Abanyegiputa nzobagabura mu kuboko kw’umutware w’imburakigongwe, kand’ umwami w’inkazi azobaganza, ni k’Umwami Uhoraho Nyen’ ingabo agize.

⁵Amazi yo mu ruzi yahora asendanisha nk’ikiyaga azobura, kand’ uruzi ruzogeruka, rukame.

⁶Inzūzi zizonuka, kand’ amazi y’imigezi yo muri Egiputa azokeha akamirikire: amarenga n’imibere bizokabirana.

⁷Indimiro zo kuri Nili, zo ku nkombe za Nili, n’ibirimwa vyose vyo kuri Nili bizokwuma, biyoke, ntibibe bikiboneka.

⁸Kandi n’ abarovyi na bo bazorira, abatera igera muri Nili bose baboroge, n’ abarobesha insenga mur’ ayo mazi bahondobere.

⁹Kand’ abakora igikorwa co gukūba inyuzi z’uduti twitwa pishita bazomāramāra, bo n’abajisha imyerupe.

¹⁰Inkingi za Egiputa zizovunagurika, n’ abacangero bazogira akabonge mu mitima.

¹¹Abaganwa b’i Sowani n’ibipfu rwose; inama z’abajanama ba Farawo b’abanyabgenge zihindutse iz’ ubusa: none muhangara mute kubarira Farawo, muti Nd’ umwana w’umunyabgenge, nd’umwana ava mu bami ba kera?

¹²Non’ abanyabgenge bawe bari hehe? Ni bakubarire, bamenye imigabo Uhoraho Nyen’ ingabo afitiye Egiputa.

¹³Abaganwa b’i Sowani bacitse ibipfu, n’abaganwa b’i Nofu barasutswe, ni bo bājimije Egiputa, kand’ ari bo buye rigumya imfuruka ry’amoko yaho.

¹⁴Uhoraho yahasutse impwemu y’iserēre, kandi bājimije Egiputa mu bikorwa vyaho vyose, nk’ukw imborerwa idandabagiranira mu vyo idashwe.

¹⁵Kandi muri Egiputa nta gikorwa kizohashoboka, ar’ icokorwa n’umutwe cank’ umurizo, ishami ry’ikigazi cank’ umubere.

¹⁶Kur’ uwo musi Egiputa hazocika bga bagore: hazohinda agashitsi hatinye, kubg’ ugushongongeza ukuboko kw’Uhoraho Nyen’ ingabo, ahashongongereza.

¹⁷Kand’ igihugu ca Yuda kizohinduka igiteye ubgoba kuri Egiputa: ūzokibarirwa wese azotinya, kubg’ imigabo Uhoraho Nyen’ ingabo yagabiye kuri Egiputa.

¹⁸Kur’ uwo musi mu gihugu ca Egiputa hazobamw’ ibisagara bitanu bivuga urunyakanani, birahira Uhoraho Nyen’ ingabo: kimwe muri vyo kizokwitwa Kiri‐haheresi.

¹⁹Kur’ uwo musi hazoba igicaniro cubakiwe Uhoraho mu gihugu ca Egiputa hagati, kand’ inkingi izoshingirwa Uhoraho ku rubibe rwaco.

²⁰Bizoba ikimenyetso n’igishingantahe k’Uhoraho Nyen’ ingabo mu gihugu ca Egiputa: kuko bazotakambira Uhoraho kubg’ ababahahaza, na we azobarungikira umukiza n’umuvunyi, azobakiza.

²¹Kand’ Uhoraho azokwimenyesha Egiputa, n’ Abanyegiputa bazomenya Uhoraho kur’ uwo musi: mbere bazosenga batanga ibimazi bashikana amashikanwa, bazosezeranira Uhoraho isezerano, barishitse.

²²Kand’ Uhoraho azokubita Egiputa, ahakubite yongere ahakize: bazogaruka k’Uhoraho, na we azobakundira kumwinginga, kand’ azobakiza.

²³Kur’ uwo musi hazoba inzira y’iroro iva muri Egiputa ija muri Ashuri, kand’ Abashuri bazogendera Egiputa, n’Abanyegiputa bagendere Ashuri; kand’ Abanyegiputa n’Abashuri bazosengera hamwe.

²⁴Kur’ uwo musi i Bgisirayeli hazoba aha gatatu kuri Egiputa na Ashuri, ar’ umugisha hagati mw isi:

²⁵kuk’ Uhoraho Nyen’ ingabo ahahaye umugisha, ati Hahirwe Abanyegiputa abantu banje, n’Abashuri igikorwa c’amaboko yanje, n’Abisirayeli ishamvu yanje.