Read Bibliya Yera 1951 Yesaya 2 Bible Online

Yesaya 2 - Bibliya Yera 1951 bible

Yesaya 2

¹Ijambo Yesaya mwene Amosi yeretswe ku b’i Buyuda n’i Yerusalemu.

² Mu misi y’iherezo umurwa wubatswekw ingoro y’Uhoraho uzogasara ku mpinga z’imisozi, uzoshirwa hejuru y’iyindi mirambi; kand’ amahanga yose azosendanisha aja kuri wo.

³Amoko menshi azojayo, abarirane, ati Ni muze tudūge, tuje ku murwa w’Uhoraho, ku ngoro y’Imana ya Yakobo, kugira ngw itwigishe ivy’ inzira zayo, natwe tuzigenderemwo; kukw i Siyoni ari ho hazova ivyagezwe, n’i Yerusalemu hakava ijambo ry’Uhoraho.

⁴Azocira imanza amahanga, atātūre amoko menshi; inkota zabo bazozivunjamw’ amasuka, n’amacumu bazoyavunjamw’ inkero;[2] nta hanga rizobangurira irindi hanga inkota, kandi ntibazokwiga kurwana ukundi.

⁵Yemwe ab’ inzu ya Yakobo, ni muze tugendere mu muco w’Uhoraho.

⁶Kukw abantu bawe, ari bo nzu ya Yakobo, wabahebeshejwe n’uko buzuyemw’ imigenzo ivuye i burasirazuba, bakaragura nk’Abafilisitiya, kandi bakifatanya n’abana b’abanyamahanga.

⁷Igihugu cabo na co cuzuye ifeza n’izahabu, kand’ ubutunzi bgabo n’isinzi; igihugu cabo cuzuye n’amafarasi, imikogote yabo n’ibitayega.

⁸Igihugu cabo cuzuye n’ibigirwamana; basenga ivyakozwe n’amaboko yabo, intoke zabo ubgabo ari zo zabikoze.

⁹Abantu bazosubizwa hasi, abahambaye bacishwe bugufi; nawe ntuz’ ubaharire.

¹⁰Injira mw isenga, wihishe mu mukungugu, uhunge ubukare bg’Uhoraho, n’ubgiza bg’icubahiro ciwe.

¹¹Kurābana agakēngērwe kw’abantu kuzocishwa bugufi, n’ubgibone bg’abahambaye buzosubizwa hasi, Uhoraho wenyene ni we azoba ashizwe hejuru kur’ uwo musi.

¹²Kuk’ Uhoraho Nyen’ ingabo afitiye umusi ivyibona vyose n’ivyivuna, n’ivyishira hejuru vyose, kandi bizocishwa bugufi.

¹³Uwo musi uzoba no ku biti vy’amasederi vy’i Lebanoni vyose birebire vyishira hejuru, no ku vy’imyeloni vy’i Bashani vyose,

¹⁴no ku misozi miremire yose, no ku misozi yose yishira hejuru,

¹⁵no ku munara wose ushizwe hejuru, no ku ruzitiro rurerure rwose rw’amabuye,

¹⁶no ku māto yose y’i Tarushishi, no ku bishushanyo vyose binezereza.

¹⁷Kand’ agakēngērwe k’abantu kazosubizwa hasi, n’ubgibone bg’abahambaye buzocishwa bugufi, Uhoraho wenyene ni we azoba ashizwe hejuru kur’ uwo musi.

¹⁸Ibigirwamana bizoherengetera rwose.

¹⁹Kand’ abantu bazokwinjira mu masenga yo mu bitandara, no mu vyobo vyo mu kuzimu, bahunga ubukare bg’Uhoraho, n’ubgiza bg’icubahiro ciwe, ah’ azohaguruka gutigitisha isi.

²⁰Kur’ uwo musi umuntu azoshibura ibigirwamana vyiwe vy’ifeza, n’ibigirwamana vyiwe vy’izahabu, ivyo bamucuriye ngw abisenge, abishiburire amafuku n’ubuhungarema;

²¹aje mu masenga yo mu bitandara, no mu bihoro vyo mu bitandara nyene, ahunga ubukare bg’Uhoraho, n’ubgiza bg’icubahiro ciwe, ah’ azohaguruka gutigitisha isi.

²²Ni mureke kwishimira abantu, abari n’impwemu gusa mu mazuru yabo: mbega bamaze iki?