Read Bibliya Yera 1951 Yesaya 21 Bible Online

Yesaya 21 - Bibliya Yera 1951 bible

Yesaya 21

¹Imbūri yo ku bugaragwa buri ku kiyaga. Nk’ukw agashururu ko mu gihugu c’i bumanuko gasuriranya, ni ko biza bivuye mu bugaragwa, mu gihugu giteye ubgoba.

²Ivyerekanywe bikomeye ndabihishurirwa; abaryarukanyi bariko bararyarukana, abanyazi bariko baranyaga. Yemwe b’i Elamu, ni mudūge mutere, namwe Bamedi, mubate hagati! Ukwitsa umutima kwabo kwose ngira nkurangize.

³Ni co gitumye ikiyunguyungu canje cuzuye uburibge, ngafatwa n’ibise nk’ibise vy’umugore ari ku nda; ndaribga bituma ntashobora kwumva, ubgihebe bg’ubgoba butumye ntashobora kubona.

⁴Umutima wanje urahuzagizwa, mpundagajwe n’ubgoba: ijoro nari nifuje ryampindukiye agatengo.

⁵Batunganya ameza, bagashirah’ abashibamyi, bakarya bakanywa. Haguruka, mwa baganwa, musīge inkinzo amavuta!

⁶Kuk’ ukw ari k’Umwami Imana ambariye: ati Genda ushireh’ umushibamyi, az’ avuge ico yabonye.

⁷Ni yabona umuce w’ingabo, ar’ abagendera ku mafarasi bagenda ari babiri‐babiri, cank’ ar’ abagendera ku ndogoba, cank’ ar’ abagendera ku ngamiya, az’ abange amatwi yumvirize cane.

⁸Maz’ avuga nk’intambge, ati Mwami, nama nirirwa mpagaze ku munara wo gushibamako, kandi ngakesha ijoro ku rubu rwanje:

⁹non’ ehe haje umuce w’ingabo zigendera ku mafarasi bagenda ari babiri‐babiri. Arongera aravuga, ati Babuloni harakomvomvowe, harakomvomvowe; n’ibishushanyo bibājwe vyose vy’ibigirwamana vyaho bihindikiraniye hasi bivunaguritse.

¹⁰Ewe wa muhūre wanje, ewe mpeke zo ku mbuga yanje! Ivyo numvise bivuye k’Uhoraho Nyen’ ingabo, Imana y’Abisirayeli, ni vyo mbabariye.

¹¹Imbūri yo kuri Duma. Harih’ ūmpamagara ar’ i Seyiri, ati Yewe mushibamyi, ijoro rigeze hehe? Yewe mushibamyi, ijoro rigeze hehe?

¹²Wa mushibamyi aramwishura, ati Bugira buce, kandi bgongere bgire: ni mwagomba kubaza, mubaze; muhindukire muze.

¹³Imbūri yo kuri Arabiya. Yewe wa gugu ry’Abadedani, mw ishamba ryo muri Arabiya ni ho muzorāra.

¹⁴Uwishwe n’inyota bamuzaniye amazi, ababa mu gihugu c’i Tema basanganije izo mpunzi ivyo kurya.

¹⁵Kuko bāriko barahunga inkota, inkota zisokōwe, n’imiheto ifoye, n’ivyago vy’intambara.

¹⁶Kuk’ ukw ari k’Umwami Imana ambariye: at’ Umwaka utarashira, urīmbūye umwaka nk’uw’ umucangero, icubahiro cose c’i Kedari kizoshira;

¹⁷n’amasigarira yo mu gitigiri c’ abarashi b’abahizi b’Abakedari bazoba imparūrwa; kuk’ Uhoraho Imana y’Abisirayeli ari we abivuze.